Einar Árni Jóhannsson þjálfari sagði sína menn í Njarðvík hafa hleypt óþarflega mikilli spennu í leikinn í lokin þegar hans menn mörðu sigur á grönnum sínum úr Grindavík í þriðja leik liðanna í undanúrslitum Iceland Express deildinni í kvöld. Njarðvík getur tryggt sér sæti í úrslitum með sigri í Grindavík á mánudaginn.
"Þetta var óþarflega tæpt hjá okkur í lokin og við vorum að brjóta óþarflega og hleypa í þetta óþarfa spennu. Það er það skemmtilega við þetta sport að þetta er aldrei búið þó annað liðið nái smá forystu. Nú verðum við bara að gíra okkur upp fyrir næsta einvígi.
Þetta var dæmigerður þriðji leikur með stöðubaráttu og allt járn í járn. Ég á ekki von á því að við eigum eftir að sjá fleiri leiki sem vinnast með 20-30 stigum," sagði Einar í samtali við Hans Steinar Bjarnason á Sýn í kvöld.
