Friðrik Már Baldursson prófessor með fulltingi Kaupþings

Viðskipta- og hagfræðideild Háskóla Íslands hefur ákveðið að dr. Friðrik Már Baldursson, gegni stöðu prófessors með fulltingi Kaupþings. Þetta er í samræmi við sambning sem HÍ og Kaupþing gerðu undir lok síðasta árs um ótímabundna kostun á stöðu prófessors í viðskipta- og hagfræðideild Háskóla Íslands.

Í tilkynningu segir að í samningnum felist meðal annars að heiti Kaupþings verði tengt við ákveðna stöðu prófessors eða dósents í fjármálum, fjármálahagfræði eða hagfræði. Slíkt fyrirkomulag er mjög algengt hjá háskólum í Bandaríkjunum og víðar. Það er hins vegar nýmæli á hér.

Samningurinn markar einnig nokkur tímamót í stuðningi atvinnulífs við Háskóla Íslands því þótt fyrirtæki hafi áður kostað stöður við háskólann hefur slíkur stuðningur ávallt verið tímabundinn. Stuðningur af þessu tagi er mjög mikilvægur fyrir Háskóla Íslands og gefur svigrúm til að efla kennslu og rannsóknir í fjármálum og tengdum greinum.

Friðrik Már hefur starfað sem prófessor við viðskipta- og hagfræðideild frá 2003. Hann starfaði áður hjá Hagfræðistofnun Háskóla Íslands, Þjóðhagsstofnun og kenndi við Columbia háskólann í New York. Rannsóknir hans beinast meðal annars að fjármálahagfræði, atvinnuvegahagfræði og hagfræði orkumarkaða. Hann hefur birt fjölda rannsóknarritgerða í innlendum og erlendum ritrýndum fagtímaritum. Þá hefur hann kennt  námskeið í fjármálastærðfræði í meistaranámi í fjármálahagfræði sem fór af stað í fyrrahaust í viðskipta- og hagfræðideild. Hann hefur einnig gegnt trúnaðarstörfum fyrir innlend og erlend fyrirtæki og stjórnvöld, að því er fram kemur í tilkynningunni.