Hlutabréfavelta á síðasta viðskiptadegi ársins 2006 slagaði hátt upp í alla veltu ársins 2001 á innlendum hlutabréfamarkaði. Veltan síðastliðinn föstudag nam tæpum 113 milljörðum króna sem mestmegnis var tilkomin vegna færslu á eignarhlut FL Group í Glitni frá Íslandi til Hollands.
Til samanburðar nam heildarveltan á Verðbréfaþingi Íslands, forvera Kauphallarinnar, 137 milljörðum króna árið 2001. Þetta var annað versta ár sem fjárfestar hafa upplifað á innlendum hlutabréfamarkaði en Úrvalsvísitalan féll um ellefu prósent frá árinu áður.
