Leiknir upp í 1. deild

Leiknir tryggði sér í kvöld sæti í 1. deild karla í fótbolta að ári þegar Breiðhyltingar sigruðu Stjörnuna, 1-2 í Garðabæ. Með sigrinum náði Leiknir 4 stiga forskoti á toppi deildarinnar en Stjarnan er í 2. sæti þegar 2 umferðir eru eftir. Vigfús Arnar Jósepsson og Helgi Jóhannsson skoruðu mörk Leiknismanna en Guðjón Baldvinsson jafnaði í 1-1 fyrir heimamenn. Stjarnan hafði mikla yfirburði í leiknum og það var þvert gegn gangi leiksins þegar Helgi Jóhannsson, nýkominn inn á sem varamaður í liði Leiknis skoraði sigurmarkið á 83. mínútu. Þá fékk Leiknir sína fyrstu hornspyrnu í seinni hálfleik og upp úr henni barst boltinn til Helga inni í vítateig Stjörnunnar. Þetta var nánast í fyrsta skipti sem Leiknir komst yfir miðju í seinni hálfleik en Stjarnan sem lék undan sterkum vindi sótti án afláts allan seinni hálfleikinn. Heimamenn náðu þó ekki nema einu virkilega góðu færi í seinni hálfleik og það var um miðjan hálfleikinn þegar skot hafnaði rétt fram hjá stöng Leiknismarksins. Jafnræði var með liðunum í fyrri hálfleik og náðu bæði lið að sýna ágætis tilburði þrátt fyrir sterkan vind. Á 19. mínútu áttu heimamenn dauðfæri þegar Valur Gunnarsson markvörður Leiknis náði að slá boltann yfir á síðustu stundu. Þremur mínútum síðar komst Leiknir yfir með marki Vigfúsar, lánsmanns frá KR. Vigfús vann boltann í teig heimamanna eftir misheppnaða hreinsun í vörninni og skoraði af stuttu færi. Mark var dæmt af Stjörnunni á 37. mínútu og þótti sá dómur Eyjólfs Kristinssonar afar umdeildur. Ekki er ljóst hvort hann dæmdi rangstöðu eða brot á Stjörnuna en varnarmaður Leiknis stóð fyrir innan marklínu þegar hann hreinsaði boltann í burtu áður en dómarinn dæmdi aukaspyrnu. Á 43. mínútu náðu heimamenn svo að jafna eftir talsverða pressu. Guðjón Baldvinsson skallaði þá boltann yfir Val í markinu í hornið fjær úr vítateignum eftir fyrirgjöf Björns Mássonar af vinstri kantinum. Njarðavík er í 3. sæti og getur aðeins fræðilega náð Leikni að stigum en myndi þannig í leiðinni aðeins gera Stjörnunni kleift að fá 3 stig í viðbót þar sem liðin eiga eftir að mætast. Leiknismenn eru þá alltaf öruggir með annað tveggja efstu sætanna í deildinni.