„Ég reyni bara að njóta fót­boltans og lífsins“

Hollenski landsliðsmaðurinn virtist á förum þar til 80 milljóna punda samningur við Manchester City, sem lét til skarar skríða í kjölfar áhuga Tottenham, rann út í sandinn.

Gakpo vissi að félagið væri að reyna að fá Bradley Barcola, beinan keppinaut um stöðu hans á vinstri kantinum, og þótt franski landsliðsmaðurinn hafi vissulega komið í samningi sem gæti numið allt að 123 milljónum punda ákváðu forráðamenn Liverpool að halda Hollendingnum á Anfield.

Hann ber þó engan kala og fullyrðir að allt sé við það sama hjá honum nú þegar tímabilið er komið vel af stað.

Gakpo, sem hefur skorað þrjú mörk líkt og Barcola til þessa, var spurður hvort hann væri að spila til að sanna sig.

„Nei, eiginlega ekki, hugarfar mitt hefur haldist óbreytt eins og það hefur alltaf verið. Ég reyni að standa mig,“ sagði hann fyrir leikinn gegn Fenerbahce í Meistaradeildinni í Istanbúl í kvöld.

„En þetta var frekar annasamt sumar varðandi mörg mál. Ég reyni bara að njóta fótboltans og njóta lífsins,“ sagði Gakpo.

Spurður um hvaða samtal hann hefði átt við félagið eftir að félagaskiptin til City runnu út í sandinn bætti hann við: „Það var nú ekki mikið um samtöl um það. Ákvörðunin var tekin og þar við sat,“ sagði Gakpo.

Leikur Fenerbahce og Liverpool verður í beinni á Sýn Sport 2 í kvöld og hefst útsendingin klukkan 17.35.