Svekkjandi tap FH eftir góðan loka­sprett

Bidasoa situr á toppi spænsku deildarinnar með fullt hús stiga þegar þrjár umferðir eru búnar og því ljóst að FH átti erfiðan leik fyrir höndum. Leikurinn var gríðarlega jafn í fyrri hálfleik og var leikurinn lengi vel jafn en í hálfleik var Bidasoa með fjögurra marka forskot, 18-14.

FH-ingar reyndu það sem þeir gátu til þess að minnka muninn en Bidasoa náði alltaf að svara með marki þegar FH skoraði. Það gekk því erfiðlega að minnka muninn og hélst bilið í fjórum mörkum lengi vel.

Lið FH er seint þekkt fyrir að gefast upp og ætlaði liðið ekki að byrja á því núna. FH náði að skora nokkur mörk í röð undir lok leiks og minnka muninn en á endanum náði liðið ekki að jafna leikinn.

Bidasoa vann því leikinn 39-37 en það eru enn möguleikar fyrir FH í riðlinum þrátt fyrir að liðið hafi tapað. Símon Michael Guðjónsson var markahæsti leikmaður FH með átta mörk ásamt Brynjari Narfa Arndal var einnig með átta mörk.

Ágúst Guðmundsson átti góðan leik og skoraði sex mörk en leikmenn FH áttu í erfiðleikum með að stöðva Esteban Salinas Munoz sem skoraði níu mörk gegn FH. Xavier Gonzalez Unciti var stutt á eftir honum með átta mörk.