Tveir nýir sér­fræðingar til Jónsbókar

Fannar Freyr er með BS-gráðu í hagfræði og meistaragráðu í gagnavísindum frá Hollandi. Hann starfaði áður hjá DataLab í gervigreind og gagnavísindum áður en hann gekk til liðs við Jónsbók. Undanfarin ár hefur hann unnið að þróun og innleiðingu fjölbreyttra sérsmíðaðra gervigreindar- og spunagreindarlausna fyrir ýmsa aðila á íslenskum markaði.

Elías er með BS- og meistaragráðu í eðlisfræði frá Háskóla Íslands og starfaði áður við þróun máltæknikerfa hjá Nordverse AI, meðal annars fyrir heilbrigðisgeirann. Auk þess starfaði hann hjá Cleanlab, bandarísku gervigreindarfyrirtæki, sem ML/AI Engineer og þróaði þar tækni fyrir teymi sem byggja og reka gervigreindarkerfi. 

Þar vann hann að þróun tækni og aðferða fyrir gagnagæði og áreiðanleika, bæði í hefðbundnu vélarnámi og í stórum mállíkönum og spunagreind.

Ráðningarnar eru í tilkynningu sagðar liður í áframhaldandi uppbyggingu, en vísisjóðurinn Crowberry Capital fjárfesti í félaginu í sumar.

„Jónsbók er nú í notkun hjá lögmannsstofum, fjármálastofnunum og sveitarfélögum á Íslandi, auk þess sem starfsemin hefur teygt sig til Póllands, Rúmeníu, Ungverjalands, Króatíu og Finnlands,“ segir í tilkynningunni.