Yfir hundrað þúsund á­horf­endur mættu á NFL-leik í Ástralíu

San Francisco 49ers og Los Angeles Rams voru langt frá sínum heimaslóðum þegar liðin mættust í fyrsta leik þeirra í NFL deildinni. Leikurinn var spilaður í Ástralíu og því langt og strangt ferðalag að baki. Leikurinn var spilaður á Melbourne Cricket Ground.

Lið 49ers ákvað að mæta til Ástralíu viku fyrir leikinn á meðan Los Angeles Rams lenti í Ástralíu innan við sólarhring frá því að leikurinn ætti að hefjast. Allt bendir til þess að aðferð 49ers hafi verið betri en liðið sýndi mikla yfirburði.

LA Rams komst þó í forystu leiksins í öðrum leikhluta þegar Kyren Williams skoraði snertimark. Við það var Rams komið með þriggja stiga forskot en 49ers skoruðu sín fyrstu stig tímabilsins með vallarmarki stuttu fyrir hlé.

Demarcus Robinson skoraði snertimark fyrir 49ers áður en flautað var til hálfleiks og leit liðið eftir það aldrei um öxl. Leikurinn endaði með 27-7 sigri 49ers þar sem leikstjórnandi liðsins, Brock Purdy, spilaði frábærlega.

Sean McVay, þjálfari Rams, var ekki sáttur eftir leikinn og sagði að þetta hefði einfaldlega ekki verið nógu gott. Ekki vildi hann þó segja að það væri eingöngu vegna ferðalagsins.