Full­komin skot­nýting Bjarka Más í spennu­trylli

Leikurinn fór fram á Sparekassen leikvanginum í Álaborg og það voru gestirnir frá Frakklandi sem voru betri aðilinn til að byrja með og þegar að fyrri hálfleikur rann sitt skeið leiddu þeir með tveimur mörkum, 18-16.

Dönsku meistararnir eru hins vegar með gífuleg gæði innan sinna raða, fóru alla leið í úrslitahelgi Meistaradeildarinnar á síðasta tímabili, og sneru leiknum sér í vil í seinni hálfleik. 

Mikil spenna var ríkjandi síðustu mínútur leiksins og munaði lengi vel bara einu marki á milli liðanna. 

Þegar að aðeins nokkrar sekúndur eftir lifðu leiks fékk PSG vítakast. Spánverjinn Ferran Solé fór á vítalínuna og skoraði undir mikilli pressu, jafnaði leikinn 33-33 og tryggði PSG stig á útivelli.

Bjarki Már átti fínan leik og skoraði fjögur mörk í fjórum skotum. Að auki lagði hann upp eitt mark.

Segja má að téður Ferran Solé hafi stolið senunni í leik kvöldsins með tíu mörk. Hjá Álaborg var það danski landsliðsmaðurinn Mads Hoxer sem var atkvæðamestur með sjö mörk og sex stoðsendingar. 

Á sama tíma í kvöld laut Porto í lægra haldi gegn ungverska liðinu Vezprem, lokatölur 36-28 öruggur sigur Vezprem. Íslenski landsliðsmaðurinn Þorsteinn Leó Gunnarsson átti eina stoðsendingu í leiknum en tókst ekki að koma boltanum í netið sjálfur.