Tjáir sig ekki um hvort mál tengt Heiðari sé til skoðunar

Sýn segist hafa sent eftirlitinu gögn í febrúar um meðferð rekstrarupplýsinga innan félagsins árið 2022. Vísir spurði Seðlabankann hvort gögnin hefðu borist, hvort þau vörðuðu viðskipti Heiðars eða Úrsus ehf. og hvort þau hefðu legið fyrir við hæfismat hans vegna stjórnarformennsku í Íslandsbanka.

Seðlabankinn svaraði spurningunum ekki efnislega og vísaði til þagnarskyldu.

„Þó að Fjármálaeftirlit Seðlabankans geti á hverjum tíma haft til skoðunar og rannsóknar tiltekin mál varðandi meint eða möguleg brot á lögum getur bankinn ekki tjáð sig efnislega um slík mál,“ segir í svarinu.

Bankinn segir ábendingar sem berist eftirlitinu metnar og skoðað sé hvort tilefni sé til frekari athugunar. Beiðni Vísis um upplýsingarnar var hafnað.

Heiðar vísar til hæfismatsins

Heiðar hefur hafnað ásökunum Gavia Invest um að hann hafi haldið upplýsingum frá félaginu þegar það keypti 12,72 prósenta hlut Úrsus í Sýn fyrir nærri 2,2 milljarða króna.

Hann segir málið fráleitt, kaupendurnir hafi tekið við stjórn Sýnar um leið og hann hafi hætt og haft fjögur ár til að kanna málið.

„Það eru engin svik,“ segir Heiðar.

Hann hefur jafnframt sagt ólíklegt að ólokið mál sem varði hann sé til meðferðar hjá Fjármálaeftirlitinu samhliða stjórnarformennsku hans í Íslandsbanka.

Seðlabankinn svaraði ekki hvort gögn Sýnar hefðu legið fyrir við hæfismatið. Í almennum upplýsingum bankans segir að uppfylli einstaklingur hæfisskilyrði fái hann bréf um að Fjármálaeftirlitið geri ekki athugasemdir við hæfi hans. Eftirlitið geti þó hvenær sem er tekið hæfi hans til sérstakrar skoðunar.

Gavia segir upplýsingum hafa verið haldið eftir

Gavia hefur höfðað skaðabótamál gegn Heiðari og Úrsus vegna hlutabréfakaupanna. Einar Hugi Bjarnason, lögmaður Gavia, segir IoT-tekjur Sýnar frá samstarfi við Controlant vera þungamiðju málsins.

IoT-tekjur eru greiðslur sem Sýn fær fyrir að tengja tæki við farsímakerfið. Í þessu tilviki komu tekjurnar frá SIM-kortum í mælum Controlant sem meðal annars voru notaðir til að fylgjast með hitastigi og staðsetningu lyfja- og bóluefnasendinga. Umsvif Controlant jukust gríðarlega í heimsfaraldri kórónuveirunnar en drógust mikið saman þegar faraldrinum slotaði.

Gavia telur að Heiðar hafi við söluna vitað að verulegur samdráttur hefði þegar orðið í tekjunum. Um innherjaupplýsingar hafi verið að ræða sem kaupandanum hafi ekki verið veittar.

Einar Hugi segir umbjóðendum sínum ekki hafa orðið málið ljóst fyrr en uppgjör Sýnar árið 2025 lá fyrir. Hann hefur jafnframt hafnað því að málshöfðunin sé liður í rógsherferð og segir um hefðbundið dómsmál að ræða.

Vísir er í eigu Sýnar.