Tómas einn vildi halda vöxtum óbreyttum

Birgir Olgeirsson skrifar 2. september 2026 16:32

Tómas Brynjólfsson, varaseðlabankastjóri fjármálastöðugleika, var eini nefndarmaður peningastefnunefndar sem vildi halda stýrivöxtum óbreyttum í ágúst. Vilhelm

Tómas Brynjólfsson, varaseðlabankastjóri fjármálastöðugleika, var eini nefndarmaður peningastefnunefndar Seðlabankans sem vildi ekki hækka stýrivexti í ágúst. Hann taldi að aðhald peningastefnunnar væri þegar töluvert og að áhrif hárra vaxta væru farin að koma skýrt fram í hagkerfinu.

Þetta kemur fram í fundargerð peningastefnunefndar sem birt var í dag.

Peningastefnunefnd ákvað 19. ágúst að hækka stýrivexti um 0,25 prósentustig, úr 7,75 prósentum í átta prósent. Vísir greindi frá því þá að fjórir nefndarmenn hefðu stutt hækkunina en einn viljað halda vöxtum óbreyttum. Ekki kom hins vegar fram í yfirlýsingunni hver hefði verið á móti hækkuninni.

Fundargerðin leiðir nú í ljós að það var Tómas.

Ásgeir Jónsson seðlabankastjóri lagði til að vextir yrðu hækkaðir og Þórarinn G. Pétursson, Herdís Steingrímsdóttir og Ásgerður Ósk Pétursdóttir studdu tillöguna. Tómas greiddi einn atkvæði gegn henni.

Taldi áhrif vaxtanna farin að sjást

Tómas sagði að aðhald peningastefnunnar væri þegar töluvert og að það hefði miðlast vel yfir í markaðsvexti og verðbólguvæntingar.

Hann taldi áhrif aðhaldsins jafnframt farin að sjást skýrt í einkaneyslu og á vinnumarkaði. Þá væru umsvif í byggingariðnaði farin að gefa eftir. Af þeim sökum taldi hann rétt að halda vöxtum óbreyttum.

Ásgeir Jónsson seðlabankastjóri, Tómas Brynjólfsson varaseðlabankastjóri og Flóki Halldórsson á fundi Seðlabankans. Tómas, fyrir miðju, var einn fimm nefndarmanna peningastefnunefndar sem vildi ekki hækka stýrivexti í ágúst.Vilhelm

Tómas taldi jafnframt að hægt væri að bregðast við á næsta fundi nefndarinnar í október ef fram kæmu vísbendingar um frekari áhrif olíuverðshækkana á verðbólgu, til dæmis í launaþróun.

Meirihlutinn óttaðist þráláta verðbólgu

Hin fjögur í nefndinni töldu hins vegar tilefni til frekari hækkunar. Verðbólga væri enn langt yfir markmiði, verðbólguvæntingar háar og hætta á að kostnaðarhækkanir leiddu til frekari verðhækkana. Möguleg endurskoðun kjarasamninga síðar á árinu var einnig nefnd sem áhættuþáttur.

Ákvörðunin var þriðja vaxtahækkun Seðlabankans í röð. Innherji fjallaði ítarlega um ákvörðunina og breyttar verðbólguhorfur bankans þegar hún var kynnt.

Á kynningarfundi sama dag kallaði Ásgeir eftir auknu aðhaldi frá bæði hinu opinbera og vinnumarkaðnum og sagði að aðilar vinnumarkaðarins gætu meðal annars stuðlað að lægri vöxtum með því að fresta umsömdum launahækkunum. Um þau ummæli var fjallað hér á Vísi.

Í maí hafði nefndin einnig hækkað vexti um 0,25 prósentustig, úr 7,5 í 7,75 prósent.

Næsta vaxtaákvörðun peningastefnunefndar verður kynnt 7. október.

Seðlabankinn Efnahagsmál