Hafnar því að hafa snuprað tækni- og hug­verka­iðnaðinn

Samtök iðnaðarins sendu frá sér yfirlýsingu í morgun þar sem þau sökuðu Viðskiptaráð um rangfærslur í skýrslu um íslenska hagkerfið og samfélagsmiðlamyndbandi sem var birt samhliða henni.

Dregin hefði verið upp mynd af því að útflutningstekjur Íslands byggðust á þremur stoðum; ferðaþjónustu, sjávarútvegi og álframleiðslu. Töldu Samtök iðnaðarins að þetta gerði lítið úr hlut tækni- og hugverkaiðnaðar sem aflaði þriðju mestu útflutningsteknanna.

Þessu hafnar Viðskiptaráð í eigin yfirlýsingu. Framsetning þess í skýrslunni hafi byggst á opinberum gögnum Hagstofunnar og gert hafi verið grein fyrir öllum útflutningstekjum.

Hins vegar notist Samtök iðnaðarins við eigin skilgreiningu á tækni- og hugverkaiðnaði sem nái þvert yfir fjölmargar atvinugreinar sem Hagstofan gerir ekki.

„Slíkar skilgreiningar geta verið gagnlegar til greiningar. Þær breyta hins vegar ekki frumgögnunum og það verður ekki rangfærsla að birta opinber gögn án þess að endurflokka þau samkvæmt sömu skilgreiningu. Munur á skilgreiningum og framsetningu gefur ekki tilefni til fullyrðinga um rangfærslur,“ segir í yfirlýsingu Viðskiptaráðs.