Minni íbúafjölgun minnkar þörfina á nýjum í­búðum

Gangi lágspáin eftir er þörf á 2.610 nýjum íbúðum árið 2026.

Þetta er meðal þess sem kemur fram í nýrri mánaðarskýrslu Húsnæðis- og mannvirkjastofnunar. Þar segir að 5.800 íbúðir séu skráðar í byggingu á landinu öllu og þar af eru tæplega fimmtungur á 5. matsstigi.

Alls var 864 kaupsamningum þinglýst í júnímánuði, sem er 9,5 prósent aukning frá því í maí en 13 prósent fækkun frá sama tíma í fyrra. Tæplega 4.900 kaupsamningum hefur verið þinglýst á landinu öllu á fyrstu sex mánuðum ársins, sem er 14 prósent fækkun frá því í fyrra.

Meðalsölutími íbúða hefur lengst mest í nágrenni höfuðborgarsvæðisins en í júní mældist þriggja mánaða meðaltal hans um 142 dagar. Að jafnaði tók um 87 daga að selja þær íbúðir sem seldust á höfuðborgarsvæðinu frá apríl og fram í júní en sölutíminn hefur verið lengstur í Garðabæ, um 137 dagar.

„Á landsbyggðinni getur meðalsölutími verið mjög breytilegur á milli mánaða þar sem kaupsamningar eru að jafnaði fáir í hverjum mánuði. Á fyrstu sex mánuðum ársins hefur meðalsölutími íbúða mælst að jafnaði um 108 dagar og hefur því lengst um fjórðung frá því á sama tímabili í fyrra,“ segir í skýrslunni.

Þá segir að hlutfallslega fáar íbúðir seljist yfir auglýstu söluverði á höfuðborgarsvæðinu, eða aðeins um tíu prósent. Hlutfallið er farið að nálgast það sem þekktist fyrir heimsfaraldurinn en þá var það átta prósent.