Kókaínnotkun næringar­fræðingsins um að kenna að boxarinn féll

Hinn 34 ára gamli Nýsjálendingur var prófaður af lyfjaeftirlitssamtökunum VADA þann 25. október en sama kvöld tapaði hann fyrir Bretanum Fabio Wardley í O2 Arena í London. Parker féll einnig á lyfjaprófi breska lyfjaeftirlitsins snemma morguns þann 26. október.

„Það gleður mig að staðfesta að bráðabirgðabanni mínu hefur verið aflétt og ég verð kominn aftur í hringinn innan skamms,“ sagði Joseph Parker. Hann átti yfir höfði sér allt að tveggja ára bann en ákvörðun um refsingu hefði verið tekin af UKAD og breska hnefaleikasambandinu (BBBoC).

Nýsjálendingurinn hefur afplánað þriggja mánaða bann en hann hefur ávallt neitað því að hafa vísvitandi tekið inn ólögleg efni.

Næringarfræðingur hans átti sökina á því að leifar af kókaíni fundust í lyfjaprófi hans en þetta kemur fram í frétt breska ríkisútvarpsins.

Parker tókst að afla nægilegra sönnunargagna til að sýna fram á að óhagstæð niðurstaða úr lyfjaprófi hans væri afleiðing snertingar við kókaín sem næringarfræðingur hans notaði.

Í yfirlýsingu frá UKAD kom fram að næringarfræðingurinn sem Parker hafði ráðið til að undirbúa bardaga sinn við Wardley væri „reglulegur neytandi kókaíns“.

UKAD sagði: „Þann 6. mars 2026 lagði hr. Parker fram sönnunargögn fyrir UKAD þar sem hann hélt því fram að óhagstæð niðurstaða úr greiningu væri afleiðing snertingar hans við kókaín sem næringarfræðingurinn sem hann hafði ráðið til að undirbúa bardagann notaði.“

Bardagaskrá Parkers í atvinnumennsku er 36 sigrar og fjögur töp. Hann var WBO-heimsmeistari í þungavigt frá 2016 til 2018 áður en hann tapaði titlinum fyrir Bretanum Anthony Joshua í Cardiff.