Laugin lokuð vegna flögnunar og lokað enn lengur næsta sumar

Vesturbæjarlaug hefur verið lokað enn eina ferðina til að bregðast við flögnun á botni laugarinnar en eins og frægt er var lauginni lokað ítrekað síðasta sumar vegna tíðra viðhaldsframkvæmda.

Þeir sem ætluðu að gera ser góðan dag i bliðviðrinu og stinga sér til sunds í Vesturbæ neyddust til að leita á önnur mið.

Umfangsmikil viðhaldsframkvæmd fór fram í lauginni síðasta sumar og var henni fyrst lokað 26. maí og opnuð aftur 19. júlí en þá drógust framkvæmdir á langinn. Þá fór laugin að flagna og var henni lokað aftur 18. ágúst en opnuð viku síðar. Í þriðja sinn var henni lokað í sólarhring 29. ágúst og stóð hún opin þangað til henni var lokað aftur 13. október fram til 28. október. Laugin verður lokuð í viku í þetta sinn.

Forstöðumaður sundlaugarinnar bindur vonir við að atburðarásin endurtaki sig ekki.

„Á síðasta ári var viðhaldslokun líka þar sem var ákveðið að fara rosalega vel í laugarkarið og því miður tókst það ekki betur en svo að hér erum við aftur ári síðar. Á einhverjum tímapunkti í vetur var orðin svona mikil flögnun í vatninu að börnin voru að synda og allt í einu var bara komið plast framan í þau.“

Ekki verður ráðist í þær framkvæmdir sem þarf til að koma í veg fyrir frekari flögnun heldur verður laugin blettuð.

„Það liggur fyrir að næsta sumar verði aðallaugin tekin aftur almennilega í gegn. Þannig eftir því sem ég veit liggur fyrir ágætlega löng viðhaldslokun næsta sumar.“

Samkvæmt upplýsingum frá Reykjavíkurborg voru þau mistök gerð í fyrra að málningin fékk ekki nægilegan tíma til að þorna en þar spilaði kalt veður einnig inn í.

„Ég held að það hafi verið vonbrigði fyrir alla. Það langaði [alla] að þetta myndi endast næstu sjö árin og við þyrftum ekki að loka nema eitthvað smotterí.“