Wise valið sam­starfs­aðili ársins hjá Companial

Viðurkenningin er veitt fyrir framúrskarandi árangur við stafræna umbreytingu og hraða innleiðingu skýjalausna sem og fyrir öflugt samstarf Wise og Companial um Microsoft Dynamics 365 Business Central. Verðlaunin voru afhent á stórri ráðstefnu sem haldin var í höfuðstöðvum Microsoft í Danmörku.

„Við lítum á þessa viðurkenningu sem staðfestingu á því að nálgun okkar sé að skila raunverulegum árangri og sem hvatningu til að halda ótrauð áfram,“ segir Jóhannes Helgi Guðjónsson, forstjóri Wise lausna.

Viðskiptavinir sækja hraðar í tækniframfarir

„Uppfærslur geta verið flóknar og tímafrekar og fyrir nokkrum árum stóðum við frammi fyrir því að þurfa að færa stóran hluta viðskiptavina okkar af eldri Navision / BC-lausnum yfir í Microsoft Dynamics 365 Business Central,“ segir Jóhannes Helgi. Miðað við hefðbundið verklag og fjölda starfsmanna hjá fyrirtækinu hefði sú vinna tekið mörg ár.

„Verkefnið kallaði því á nýja nálgun með aukinni stöðlun, skýrari ferlum og mun meiri skalanleika en hefðbundin innleiðingarverkefni gera ráð fyrir. Með þeirri nálgun og öflugu samstarfi við Companial og Microsoft tókst okkur að stytta innleiðingartímann um meira en helming.“

Jóhannes segir flutning í skýið skila viðskiptavinum miklum ávinningi, meðal annars í einfaldari og öruggari rekstri. Einnig auðveldi hann fyrirtækjum að nýta gervigreind í kerfum Microsoft til að auka sjálfvirkni og ná fram verulegum vinnusparnaði: „Þegar fyrirtæki eru komin yfir í skýið getum við einbeitt okkur enn betur að því að hjálpa þeim að ná árangri og veita þeim góða þjónustu.“

Skilvirkara og skalanlegra verklag

Í rökstuðningi Companial kemur fram að Wise hafi sýnt hvernig breyta megi hefðbundinni nálgun við kerfisflutninga í skilvirkara og skalanlegra verklag.

„Á síðasta ári hefur félagið ekki aðeins hraðað eigin umbreytingarferlum heldur einnig tekið upp opnara og markvissara samstarf við okkur,“ segir Kim Enrum, framkvæmdastjóri Companial á Norðurlöndum. „Niðurstaðan er samstarf sem byggir á trausti, gagnsæi og sameiginlegri áherslu á raunverulegt virði fyrir viðskiptavini. Það er einmitt það sem þessi viðurkenning stendur fyrir.“