Máli Alcoa gegn Eim­skip vísað frá

Þetta kemur fram í tilkynningu frá Eimskip til Kauphallarinnar. Þar er rifjað upp að Alcoa hafi ákveðið í maí 2025 að fella niður fyrra skaðabótamál gegn Eimskip og greiða félaginu málskostnað. 

Alcoa hafi síðan höfðað mál að nýju í desember 2025, þó þannig að engin fjárkrafa hafi verið gerð heldur hafi verið stefnt til viðurkenningar á bótaskyldu án fjárhæðar. Því máli hafi nú verið vísað frá dómi.

„Það var og er mat Eimskips að ekkert tilefni hafi verið til málsóknar Alcoa, enda eru skilyrði skaðabótaskyldu ekki uppfyllt. Þá er ætlað tjón Alcoa engum haldbærum gögnum stutt.“

Sagt hafa kostað 62 milljarða króna

Árið 2023 komst Samkeppniseftirlitið að þeirri niðurstöðu að Eimskip og Samskip hefðu haft ólöglegt samráð á árunum 2008 til 2013.

Ráðgjafafyrirtækið Analytica vann frummat fyrir Félag atvinnurekenda, Neytendasamtökin og VR, en samkvæmt því hafði ólöglegt samráð Eimskipa og Samskipa kostað íslenskt samfélag tæplega 62 milljarða króna á fyrrnefndu tímabili.