Boðar Icelandair og flug­menn til fundar annað kvöld

Þetta er fyrsti fundurinn sem er haldinn síðan á föstudag en fundað hafði verið þétt fram að því.

Ástráður Haraldsson ríkissáttasemjari segir tímasetningu fundarins að kvöldi tilkomna vegna þess að hreinlega hafi ekki verið unnt að koma mönnum saman til fundar á öðrum tíma en þessum.

Á fundinum annað kvöld verður rætt um vinnufyrirkomulag flugmanna hjá Icelandair. Þar takast á hagsmunir félagsins af því að geta nýtt mannafla sinn betur og hagsmunir flugmanna af því að frí þeirra séu virt og vernduð.

Markmiðið er að reyna að finna lausn sem gefur Icelandair meira svigrúm í skipulagningu flugs en tryggir um leið að flugmenn geti treyst því að frídagar þeirra verði ekki skertir eða raskaðir með ófyrirsjáanlegum hætti.

Inn í deiluna blandast þó önnur málefni sem varða til dæmis svokallaða blautleigu, sem er þegar flugfélag leigir flugvél með áhöfn af öðru flugfélagi. Heimild er fyrir því að grípa til slíks úrræðis í undantekningartilvikum í dag, en deilt er um auknar heimildir til þess.

Þá eru einnig fyrirhuguð kaup Icelandair á 49% hlut í Play Europe á Möltu til umræðu og hvaða þýðingu þau hefðu fyrir rekstur Icelandair og störf flugmanna sem tilheyra Félagi íslenskra atvinnuflugmanna.

Hingað til hafa viðræður þessara tveggja aðila, Icelandair og Félags íslenskra atvinnuflugmanna, gengið hægt og deilan lítið þokast áfram.