Næst stærsti hlut­hafi Icelandair segir ó­breytta stöðu ekki val­kost

Á dögunum færði Viðskiptablaðið þær fregnir að mikil óánægja væri hjá hluthöfum Icelandair vegna stöðunnar sem er uppi vegna kjaradeilna við flugmenn. Viðskiptablaðið hafði það eftir heimildum að hluthafar skoði grundvallarbreytingu á rekstri Icelandair í ljósi stöðunnar vegna flugmanna. Ein leiðin væri að sameina félagið við erlent flugfélag, önnur leiðin að flytja allan rekstur félagsins út fyrir landsteinana og sú þriðja að leysa félagið upp.

Davíð segir Gildi lífeyrissjóð ekki hafa tekið þátt í slíku samtali, en vel sé hins vegar fylgst með félaginu og áhyggjur séu af stöðunni sem sé uppi og horfum.

„Sjálfbær og arðsamur rekstur er grundvallarforsenda fyrir félagið og mikilvægt að það finni góðar lausnir til að tryggja farsæla starfsemi sína til framtíðar. Óbreytt staða er í raun ekki valkostur,” segir Davíð í svari við fyrirspurn Vísis.

Frá árinu 2018 hefur Icelandair tapað um 80 milljörðum króna, þrátt fyrir hagnað árið 2023 og mettekjur í fyrra. Þar vegur þungt tap tengt svokölluðum faraldursárum árið 2020 og 2021 sem nam 60 milljörðum króna.

Stærsti einstaki hluthafi Icelandair er bandaríski fjárfestingarsjóðurinn Bain Capital með 17,2 prósenta hlut.

Lífeyrissjóðir eru áberandi meðal tuttugu stærstu hluthafa Icelandair Group. Þar eru níu lífeyrissjóðir sem fara samanlagt með 21,25 prósenta hlut í félaginu. Stærstur þeirra er Gildi lífeyrissjóður með 4,76 prósent, þá Almenni lífeyrissjóðurinn með 3,75 prósent, Brú lífeyrissjóður með 3,73 prósent og LSR með 3,61 prósent. Birta lífeyrissjóður fer með 1,74 prósenta hlut, Lífeyrissjóður verzlunarmanna með 1,36 prósent, Lífeyrissjóður Vestmannaeyja með 0,87 prósent, Söfnunarsjóður lífeyrisréttinda með 0,82 prósent og Frjálsi lífeyrissjóðurinn með 0,61 prósent.

Gerður Guðjónsdóttir, framkvæmdastjóri lífeyrissjóðsins Brúar, segir almenna stefnu sjóðsins að tjá sig ekki um rekstur eða málefni einstakra félaga eða umræður sem kunna að vera í gangi hverju sinni. Lögð sé áhersla á ábyrga eignastýringu og að fylgjast með þróun mála í félögum sem sjóðurinn á hlut í í samræmi við hlutverk sjóðsins sem fjárfestis. Því muni sjóðurinn ekki tjá sig um þau atriði sem nefnd voru í frétt Viðskiptablaðsins.