„Eins og að mennirnir sem stjórna Tinda­stóli séu að missa hausinn“

Sævar sagði að svo virtist sem forráðamenn Tindastóls væru að missa hausinn, lentir 2-0 undir í einvíginu um Íslandsmeistaratitilinn í körfubolta.

Kane sendi stuðningsfólki Tindastóls ítrekað fokkjúmerki, strax eftir leik, samhliða því sem hann fagnaði með eigin stuðningsmönnum sem einnig fjölmenntu í Síkið, þar sem Grindavík vann á endanum 86-83 í æsispennandi leik.

Dagur Þór Baldvinsson, formaður körfuknattleiksdeildar Tindastóls, sá hvernig Kane hegðaði sér, reiddist og lét hann heyra það. Arnar Guðjónsson þjálfari Tindastóls gagnrýndi hegðun Kane sömuleiðis harðlega í viðtali eftir leik.

Brot úr viðtalinu, hegðunina og umræðu í Körfuboltakvöldi má sjá hér að neðan.

Sérfræðingarnir í Körfuboltakvöldi hvöttu hins vegar forráðamenn Tindastóls til þess að einbeita sér að körfuboltanum í stað þess að láta Kane hafa þessi áhrif á sig.

„Það er eins og að mennirnir sem stjórna Tindastóli séu að missa hausinn. Þjálfarinn og í þessu tilviki formaðurinn. Áhorfendurnir voru ekkert að gera sig líklega til að fara inn á völlinn,“ sagði Sævar í beinni útsendingu úr Síkinu eftir leik í gærkvöld og honum var mikið niðri fyrir.

„Við höfum hundrað sinnum séð einhverja stæla og eitthvað svona eiga sér stað. Þetta er auðvitað algjör óþarfi hjá Kane og auðvitað á hann bara að sleppa þessu en menn verða bara að halda haus. Mega ekki missa sjónar á því sem skiptir mestu máli og það er að vinna körfuboltaleiki.

Arnar talar um skotin hjá Tindastóli, að þetta sé eins og rúlletta. Þetta hefur bara ekkert með rúllettu að gera. Körfubolti er ekki rúlletta og snýst ekki um heppni. Skotin fóru ekki ofan í því það er eitthvað vanstillt,“ sagði Sævar og benti á að aðalmenn Tindastóls væru þeir sem væru að taka skotin gegn Grindavík. Skortur á sjálfstrausti hljóti að hafa áhrif á það að í gær var þriggja stiga nýtingin aðeins 15,8%.

„Eftir höfðinu dansa limirnir. Það þarf að fara að finna einhverja lausn á vandamáli Tindastóls sem er inni á vellinum. Ekki á því hvort Kane sé með einhverja stæla við áhorfendur,“ sagði Sævar.

Þriðji leikur liðanna er á föstudagskvöld og þar geta Grindvíkingar með sigri tryggt sér Íslandsmeistaratitilinn. Lið sem komast í 2-0 í úrslitaeinvíginu hafa aldrei tapað einvíginu.