Klúður Koo bjargaði lífi hestaþjálfara

New York Giants var að spila við New England Patriots á mánudagskvöldi í desember. Hestaþjálfarinn Mark Toothaker var einn þeirra sem horfði á leikinn. Það gerði hann upp í rúmi með eiginkonu sinni, Malory.

Kóreski sparkarinn Younghoe Koo stal þá senunni í leiknum á frekar neikvæðan hátt. Hann var að reyna að skora vallarmark fyrir Giants en ekki vildi betur til en svo að hann sparkaði í grasið. Ótrúlega klaufalegt.

Toothaker gjörsamlega sprakk úr hlátri er hann sá atvikið. Í raun hló hann svo mikið að hann fékk flog.

„Ég hafði aldrei fundið svona tilfinningu áður. Þetta var eins og væri að fá raflost,“ segir Toothaker í samtali við AP.

Eiginkona hans er hjúkrunarfræðingur og hún hélt í fyrstu að eiginmaðurinn væri að grínast. Hún sá þó fljótt að svo var ekki og þá hringdi hún á sjúkrabíl.

Er hestaþjálfarinn var skoðaður á spítalanum kom í ljós að hann var með æxli í höfðinu á stærð við tennisbolta. Æxlið var fjarlægt hið fyrsta og Toothaker var kominn heim viku síðar. Hann er heill heilsu og veit að það hefði farið illa ef æxlið hefði ekki uppgötvast fyrr en löngu síðar.

„Sparkarinn bjargaði lífi mínu. Ég trúi því í einlægni að ég hafi verið á réttum stað á réttum tíma. Klúður Koo kom svo atburðarrásinni af stað. Þetta var kraftaverk,“ segir Toothaker sem er 59 ára gamall.

Um helgina mun einn af hestunum hans keppa á hinu fræga Kentucky Derby. Hann vill gjarna bjóða Koo þangað sem gesti sínum. Toothaker gerir sér grein fyrir því að þetta var erfið stund fyrir sparkarann en hún bjargaði lífi.

Koo, sem hefur verið einn besti sparkari deildarinnar um árabil, missti vinnuna hjá Giants tveimur vikum síðar og er atvinnulaus sem stendur.