Oddaleikurinn færður vegna árs­há­tíðar

Oddaleikur Vals og Keflavíkur í 8-liða úrslitum Bónus-deildar karla í körfubolta átti upphaflega að fara fram á laugardagskvöld. Leiknum hefur hins vegar verið frestað um sólarhring, vegna árshátíðar Bláa lónsins.

Það mun því ráðast á sunnudaginn hvort liðanna kemst í undanúrslit og mætir þar deildarmeisturum Grindavíkur. Mikil eftirvænting ríkir fyrir leiknum á sunnudaginn enda um fyrsta oddaleikinn að ræða í úrslitakeppni karla í vor.

Undanúrslitaeinvígið hefst svo strax næsta miðvikudagskvöld og því skammt stórra högga á milli fyrir liðin.

Samþykki Keflvíkinga þurfti fyrir því að fresta leiknum um helgina en Theódór Hjalti Valsson, mannvirkja- og viðburðastjóri hjá Val, segir það hafa verið auðsótt mál.

Einvígi Vals og Keflavíkur er það eina sem enn er ólokið í 8-liða úrslitunum. Grindavík sló Njarðvík út með sigri í fjórða leik liðanna á þriðjudagskvöld og fær því fimm dögum lengra hlé á milli einvíga en mótherji liðsins í undanúrslitum.