KR með bakið upp við vegg: „Erum ekki klárir í að fara í sumar­frí“

Stjarnan komst 2-1 yfir í ein­vígi liðanna með öruggum sigri á heima­velli á dögunum. Fram­undan er leikur fjögur í ein­víginu en liðin hafa unnið heima­leiki sína til þessa. Með sigri í kvöld sendir Stjarnan, KR í sumar­frí og tryggir sér sæti í undanúr­slitum en sigur heima­manna í Vestur­bænum knýr fram odda­leik.

„Við þurfum að sigra og erum bara spenntir,“ segir Jakob Örn, þjálfari KR í sam­tali við Vísi. „Við erum að fara spila á heima­velli fyrir framan troðfulla Meistara­velli. Það er mikilvægt að átta sig á því. Við verðum að njóta þess að fá svona stóra leiki. Það er alveg klárt að við ætlum að lengja seríuna. Koma þessu í odda­leik.“

Heima­völlurinn gefi KR-liðinu mikið.

„Það sýndi sig í leik tvö í þessu ein­vígi. Það var gríðar­lega góð stemning á Meistara­völlum. Rosa­lega góður stuðningur sem við fengum í þeim leik. Og í raun hefur þetta verið þannig hjá okkur í allan vetur. Það er alveg klárt að spila á heima­velli, fyrir framan troðfulla höll, er eitt­hvað sem gefur okkur rosa­lega mikinn kraft og sjálf­s­traust. Við höfum verið mjög erfiðir við að eiga á heima­velli. Ég er bara mjög bjartsýnn.“

KR-ingar munu hins vegar þurfa að eiga mun betri leik í kvöld heldur en í Garða­bænum á dögunum þar sem að Stjarnan tók öll völd á vellinum í seinni hálf­leik og sigldi heim öruggum tuttugu og fjögurra stiga sigri, 104-80.

„Þrátt fyrir að staðan hafi verið nokkuð jöfn í fyrri hálf­leik þá voru samt margir hlutir þar sem við vorum ekki að gera nægi­lega vel. Hlutir sem við höfðum gert betur fyrr í þessu ein­vígi. Svo náttúru­lega misstum við þetta bara alveg frá okkur í seinni hálf­leik. Það er eitt­hvað sem við þurfum klár­lega að læra af. Mér fannst við ekki standa nógu vel saman þegar að Stjarnan byrjaði vel í seinni hálf­leik.

Við vorum ekki alveg klárir og náðum svo aldrei að finna okkar takt, sér­stak­lega varnar­lega. Stjarnan byrjaði bara á því að fá auðveld skot, auðveldar körfur og snið­skot. Þá var allur skriðþungi með þeim. Þeir, eins og við, eru mjög sterkir á heima­velli. Þegar að þeir komast á bragðið, með stúkuna með sér, er erfitt við þá að eiga. Við náðum bara aldrei að komast í takt við leikinn. Náðum ekki að gera atlögu að þeim í seinni hálf­leik.“

Það er farið að vora úti en þið eruð ekki til­búnir í að fara í sumar­frí alveg strax?

„Klár­lega ekki. Þetta er það skemmti­legt. Verður bara skemmti­legra og skemmti­legra eftir því sem líður á úr­slita­keppnina. Við erum ekki klárir í að fara í sumar­frí. Okkur langar í fleiri stóra leiki og sjá hvað við getum komist langt.“

Leikur fjögur í ein­vígi KR og Stjörnunnar í átta liða úr­slitum Bónus deildar karla í körfu­bolta hefst klukkan hálf átta í kvöld og verður sýndur í beinni út­sendingu á Sýn Sport Ís­land.