Á­ætlunar­flug prófað á rafmagnsflugvélum

Í kvöldfréttum Sýnar mátti sjá bandarísku rafmagnsflugvélina Beta Alia lenda á flugvellinum á eynni Storð við vesturströnd Noregs síðastliðið haust. Norska flugfélagið Bristow Norway hefur undanfarna mánuði prófað flugvélina í samstarfi við bandaríska flugvélarsmiðinn Beta Technologies og norsk stjórnvöld, mest á flugleiðinni milli Bergen og Stavangurs.

Tveir flugmenn eru um borð en engir farþegar. Eingöngu er flogið með pakka enda telst þetta vera tilraunaflug þar sem verið að prófa hvernig rafmagnsflugvélar reynast í reglubundnu flugi innan Noregs við misjafnar aðstæður.

Og núna eru Skotar einnig byrjaðir að prófa samskonar rafmagnsflugvél. Hún fór fyrir tólf dögum í sitt fyrsta póstflug á vegum skoska flugfélagsins Loganair en flogið var frá Glasgow til Dundee. 

Ætlunin er að nota flugvélina á næstu mánuðum í flugi til fleiri staða eins og Aberdeen, Inverness og Orkneyja og verður eingöngu flogið með póst.

Bandaríkjamenn eru reyndar byrjaðir að prófa hana með farþega um borð. Hún er með sæti fyrir fimm farþega, flýgur á allt að 270 kílómetra hraða og flugdrægið er sagt milli fjögurhundruð og sexhundruð kílómetrar. 

Framleiðandinn fullyrðir að rafmagnsflugvélin sé margfalt ódýrari í rekstri en hefðbundnar flugvélar, bæði orkukostnaður og viðhaldskostnaður sé mun lægri. Og núna boðar fyrirtækið nítján sæta rafmagnsflugvél.