Ísraelar hyggjast her­nema suður­hluta Líbanon

Hundruð þúsunda íbúa á svæðinu frá landamærunum og að Litani hafa neyðst til að flýja heimili sín vegna árása Ísraelshers á skotmörk tengd Hezbollah. Katz segir þá ekki munu geta snúið aftur fyrr en öryggi íbúa í norðurhluta Ísrael hafi verið tryggt.

Áhyggjur eru uppi í Líbanon um að Ísraelsmenn hyggist leggja svæðið undir sig en forsetinn Joseph Aoun sagði árás Ísraels á Qasmiyeh-brúna, sem tengir suðurhluta Líbanon við restina af landinu, „forleik að innrás“.

Þá vakti það mikla athygli þegar Bezalel Smotrich, fjármálaráðherra Ísrael, sagði í gær að Ísraelar ættu að færa landamæri sína upp að Litani-á. 

„Yfirstandandi átökum í Líbanon verður að ljúka með róttækum breytingum, til viðbótar við tortímingu hryðjuverkahópsins Hezbollah,“ sagði hann þegar hann ávarpaði skoðanabræður sína á þinginu. „Litani verður að verða ný landamörk okkar við ríkið Líbanon, alveg eins og „gula línan“ í Gasa og eins og öryggissvæðið og tindurinn á Hermon í Sýrlandi.“

Smotrich sagði þá stöðu ekki mega koma upp aftur að óvinurinn lægi upp við varnartálmana. Hann yrði hrakinn á brott og „dauðhreinsuðum“ öryggissvæðum komið á milli óvinarins og borgara Ísrael.

Þess ber að geta að Katz sagði sjálfur fyrr í mánuðinum að íbúar Líbanon myndu mögulega verða af landsvæði ef þarlend stjórnvöld afvopnuðu ekki Hezbollah.