Stofnandi Bláa lónsins nú for­maður stjórnar

Þar kemur fram að Grímur er stofnandi Bláa Lónsins hf. og gegndi störfum sem forstjóri félagsins frá stofnun þess, árið 1992, fram til aðalfundarins í dag en Sigríður Margrét Oddsdóttir hefur nú tekið við af honum sem forstjóri. Hún lét af störfum sem framkvæmdastýra Samtaka atvinnulífsins fyrir stuttu og tók Bjarni Benediktsson, fyrrverandi ráðherra og formaður Sjálfstæðisflokksins, við af henni.

„Ég er virkilega stoltur af því sem við höfum byggt upp og með sama hugarfari munum við halda áfram að byggja upp nýja áfangastaði víða um land og sækja fram á þeim mörkuðum sem við störfum. Með því að horfa til langs tíma, byggja á gæðum, hönnun og þeim einstöku eiginleikum sem Ísland hefur að bjóða er framtíð félagsins björt, tækifærin eru vissulega til staðar.“ segir Grímur Sæmundsen í tilkynningunni.

Í tilkynningu um aðalfund Bláa lónsins kemur einnig fram að rekstrartekjur Bláa lónsins hafi numið 156 milljónum evra sem samsvarar 22,5 milljörðum íslenskra króna. Til samanburðar voru tekjurnar 115 milljónir evra árið áður, sem samsvarar 15,6 milljörðum króna.

„Bláa lónið er einstakt fyrirtæki og nátengt orðspori Íslands á heimsvísu; það er heiður að leiða félagið inn í næsta kafla sögu þess., segir Sigríður Margrét Oddsdóttir, í tilkynningu.

Þá segir í tilkynningu að EBITDA félagsins nam €29,4 milljónum. Árið 2024 nam hún €9,6 milljónum og að hagnaður af rekstri á árinu nam €6,6 milljónum sem samsvarar tæpum milljarði íslenskra króna. Tap á árinu 2024 nam €7,6 milljónum.

Eiginfjárhlutfall Bláa Lónsins hf. var 52% við árslok til samanburðar við 53% árið á undan. Eignir í árslok námu €423,5 milljónum sem samsvarar um 61 milljarði íslenskra króna.

• Skattspor Bláa Lónsins hf. nam rúmlega 4,3 milljörðum króna á árinu sem samanstendur m.a. af staðgreiðslu launa, VSK og öðrum opinberum gjöldum.
• Stöðugildi í árslok 2025 voru 806 en voru 727 í lok ársins á undan.
• Félagið varði um 150 milljónum króna til ýmissa samfélagsverkefna á árinu.