BYKO og Tækni­skólinn sam­eina krafta sína á Verk og vit

Eins og fyrri ár tekur BYKO þátt enda hefur fyrirtækið verið einn af bakhjörlum sýningarinnar frá upphafi. „Við erum alltaf með nýjar áherslur á hverri sýningu og í ár er aðaláherslan lögð á tengingu atvinnulífsins við skólakerfið sem við teljum afar mikilvæga og raunar einn af hornsteinum nýsköpunar og framþróunar,“ segir Sigurður Brynjar Pálsson, forstjóri BYKO.

„Tækniskólinn verður með okkur á básnum í ár en við höfum unnið saman að mjög skemmtilegu samstarfsverkefni í vetur. Við settum í sameiningu litla hugmyndasamkeppni í hóp sem lýkur stúdentsprófi af hönnunar- og nýsköpunarbraut skólans í vor. Verkefnið var að hanna saunaklefa sem uppfyllir þarfir og væntingar íslenska markaðarins. Þátttakan var góð og fengu nemendur frjálsar hendur við hönnun og sköpun saunaklefans. Sigurvegarar samkeppninnar voru þær Harpa Hua Zi Tómasdóttir, Matthildur Ingadóttir og Svandís Halldórsdóttir og þær verða með okkur um helgina.“

Nánari upplýsingar um Verk og vit má finna hér.

Verðlaun afhent á sýningardegi

Hugmyndasamkeppnin tókst afar vel að mati Sigurðar sem segist fullviss um að nemendurnir sem tóku þátt hafi bæði haft gagn og gaman af. „Þú getur rétt ímyndað þér viðbrigðin fyrir nemendur að vinna með stórfyrirtæki eins og okkur og tengjast atvinnulífinu með þessum hætti. Fimm hópar fóru af stað í þetta verkefni sem skiluðu fimm hugmyndum sem allar voru góðar en um leið mjög ólíkar. Tvær hugmyndir stóðu upp úr og fengu þrjú atkvæði hvor. Því klofnaði dómnefndin og þurfti að taka einn aukafund áður en hún komst að endanlegri niðurstöðu.“

BYKO og sigurvegarar samkeppninnar, þær Harpa, Matthildur og Svandís, munu undirrita samning um helgina og mun BYKO á næstunni hefja sölu á sánahúsunum eða nánar tiltekið á sánagrindinni. „Grindin kemur með gluggum og hurð og viðskiptavinur velur sjálfur klæðningu og lit eftir smekk.“

Verkefnið hefur teygt anga sína inn í nokkrar deildir Tækniskólans. „Kennari í tækniteiknun sá um teiknivinnuna og nemendur í húsasmíði ætlar að reisa sánahúsið jafnt og þétt á meðan sýningin stendur yfir um helgina þannig að það verður mjög skemmtilegt að fylgjast með þessari fæðingu.“

BYKO kynnir áhugaverða nýjung

Á sýningunni mun BYKO einnig kynna áhugaverða nýjung á sviði utanhússklæðningar en um er að ræða brunavarða timburklæðningu frá danska framleiðandanum Nordisk Profil. „Þessar klæðningar hafa notið sívaxandi vinsælda síðustu misserin í Evrópu og vakið athygli fyrir að sameina náttúrulegt timburútlit, sem margir kjósa, og strangari brunakröfur sem gerðar eru til byggingarefna í dag.“

Uppsetningin er jafnframt einföld og skilvirk og því er varan áhugaverður nýr valkostur í flokki utanhúsklæðningar hér á landi að sögn Sigurðar. „Gestum sýningarinnar gefst kostur á að kynna sér vöruna nánar og þreifa á henni auk þess sem framleiðandinn verður á staðnum. Um leið munum við líka sýna timburklæðningar sem eru valkostir á saunaklefann. Þannig mætast hönnun, efnisval og framkvæmd í einni heild og gefa gestum skýra mynd af því hvernig vörurnar nýtast í raunverulegum verkefnum. Ég hvet því sem flesta til að líta í heimsókn til okkar um helgina.“