Risa leikur í kvöld: „Einn af þeim stærri í sögu Þórs Þor­láks­hafnar“

„Þetta er risa leikur. Bara einn af þeim stærri í sögu Þórs Þorlákshafnar síðan að liðið fór upp í úrvalsdeild fyrir sextán árum síðan. Auðvitað var leikurinn um Íslandsmeistaratitilinn stærri en nú erum við að reyna forðast fallið og halda okkur í deild á meðal þeirra bestu. Þetta verður rosalegur leikur og við þurfum eiginlega að fá alla Þorlákshafnarbúa til þess að mæta á leikinn og styðja við strákana. Ég veit að þeir verða tilbúnir.“

Fyrir leik kvöldsins eru Þórsarar í 10.sæti Bónus deildarinnar með 10 stig, tveimur stigum frá fallsæti þar sem að Ármann situr. Ármenningar unnu fyrri leik liðanna og geta því með sigri í kvöld tryggt sér innbyrðisviðureignina gegn Þórsurum sem gæti talið ansi mikið ef liðin enda jöfn að stigum að lokinni deildarkeppni.

Þórsarar Lárusar ætla að reyna koma í veg fyrir það og hann treystir á samstöðu samfélagsins í Ölfus í baráttunni í kvöld.

„Ég veit alveg hversu megnugir Ölfusingar eru þegar að þeir standa saman. Ég veit að það er mjög erfitt að vinna okkur þegar höllin er full. Það skiptir gríðarlega miklu máli fyrir okkur að fá góðan stuðning í kvöld.“

Allir viti mikilvægi leiksins.

„Ég held það sé betra að spila undir pressu og tel það ýta undir að leikurinn verði góður frekar en hitt. Mér finnst við hafa spilað betur í vetur þegar að það er mikið undir, eins og til að mynda á útivelli gegn ÍR á dögunum.“

Þrátt fyrir að staðan sé þröng núna og Þórsarar í harðri fallbaráttu á liðið enn tölfræðilegan möguleika á að komast í úrslitakeppni deildarinnar. Lárus og hans menn eru ekkert að hugsa um það núna.

„Akkúrrat núna er það markmið númer eitt, að tryggja sæti okkar í deildinni. Allt annað er bónus. Það þarf náttúrulega mikið að ganga upp svo við komumst í úrslitakeppnina. Ef við vinnum í kvöld erum við komnir í góða stöðu með að halda sæti okkar í deildinni. Ef við töpum í kvöld eru tveir leikir inni. Fyrst fókus á leikinn í kvöld og að halda sæti okkar í deildinni. Ef við vinnum þá getum við farið að hugsa eitthvað annað.“

Leikur Þórs Þorlákshafnar og Ármanns í Bónus deild karla í körfubolta hefst klukkan korter yfir sjö í kvöld og verður sýndur í beinni útsendingu á Sýn Sport Ísland 3.