Bjarki lætur staðar numið í Dalabyggð

Þetta kemur fram í færslu Bjarka á Facebook. 

„Ákvörðun mín um að gefa ekki kost á mér áfram í starf sveitarstjóra í Dalabyggð er tekin að vel ígrunduðu máli. Það hefur verið mér bæði heiður og ánægja að gegna starfinu frá því ég tók við því 1. ágúst 2022. Starfið hefur verið allt í senn - skemmtilegt, fjölbreytt, lærdómsríkt og krefjandi og ég er þakklátur fyrir það traust sem mér hefur verið sýnt af kjörnum fulltrúum, góðu starfsfólki sveitarfélagsins og íbúum,“ segir Bjarki.

Framtíðin sé óljós en hann sé opinn fyrir ýmiss konar spennandi áskorunum á borð við þá að taka við sem sveitarstjóri Dalabyggðar sumarið 2022.

„Ég hef mikinn áhuga á sveitarstjórnarmálum og hef notið þess að starfa innan þess geira nú sem fyrr. Ef spennandi tækifæri gefst á þeim vettvangi mun ég skoða það af alvöru að halda áfram að stússast í sveitarstjórnarmálum og þá á þessum sama grundvelli og síðan árið 2022, ferli mínum sem kjörinn fulltrúi á sveitarstjórnarstiginu er lokið.“