Ríkis­stjórnin fái kynningu um þjóðar­at­kvæði á föstu­dag

Þetta sagði Þorgerður Katrín Gunnarsdóttir utanríkisráðherra við fréttastofu að loknum fundi ríkisstjórnar í morgun.

„Þetta er bara allt að koma og það má gera ráð fyrir að ég kynni þingsályktunina á föstudaginn fyrir ríkisstjórn og þá verða þingflokkar ríkisstjórnarinnar kallaðir saman.“

Þegar hún var spurð hver forsenda þjóðaratkvæðagreiðslunnar ætti að vera, það er að segja hvort kosið verði um áframhaldandi aðildarviðræður á grundvelli umsóknar sem ríkisstjórn Samfylkingar og Vinstri grænna lagði fram árið 2009, eða um nýja aðildarumsókn á grundvelli nýrra samningsmarkmiða svarar Þorgerður að það liggi fyrir að umsóknin frá 2009 sé í fullu gildi.

Áhöld eru um hvort umsóknin sé í raun gild. Gunnar Bragi Sveinsson, þáverandi utanríkisráðherra, sendi bréf til Evrópusambandsins árið 2015 þar sem tilkynnt var að ekki ætti lengur að líta á Ísland sem umsóknarríki. Urslua von der Leyen, forseti framkvæmdastjórnar Evrópusambandsins, sagði á blaðamannafundi á Íslandi í fyrra að umsókn Íslands um aðild að ESB væri enn gild.

„Það náttúrlega liggur fyrir að umsóknin síðan 2009, hún er í fullu gildi,“ segir Þorgerður Katrín.

Hún segir að sér þyki vænt um að heyra að fólk vilji setja fram samningsmarkmið.

„Af því í hina röndina þá eru þeir sem eru mest mótfallnir að segja að það sé ekki um neitt að semja. Auðvitað er um margt að semja, samningsmarkmið Íslands eru skýr að mínu mati, að við þurfum að verja stöðu Íslands í þessum gjörbreytta heimi. Við þurfum að tryggja efnahagslegar varnir Íslands líka í tengslum við þetta og við þurfum að sjálfsögðu að hafa yfirráð yfir okkar fiskveiðiauðlindum, það er algjört prinsippatriði.“

Fréttin hefur verið uppfærð.