Helena ekki lengur ein í þrjá­tíu stiga þrennuhópnum

Jónína Þórdís endaði leikinn með 36 stig, 12 fráköst og 10 stoðsendingar og varð aðeins önnur íslenska körfuboltakonan frá upphafi til að ná þrjátíu stiga þrennu í efstu deild kvenna.

Aðeins ein íslensk kona var í þessum hópi eða Helena Sverrisdóttir. Helena er því ekki lengur ein í þrjátíu stiga þrennu-hópnum.

Jónína Þórdís naut vissulega góðs af því að spila í 55 mínútur í leiknum en hún hitti úr 13 af 26 skotum sínum þar af fjórum af tólf þriggja stiga skotum.

Helena Sverrisdóttir náði þessu alls þrisvar sinnum á sínum ferli. Fyrst á tímabilinu 2005–2006 en síðast tvisvar með tveggja vikna millibili í marsmánuði 2016.

Helena var aðeins sautján ára gömul þegar hún náði þessu fyrst í sigri á KR í desember 2005 en hún var þá með 33 stig, 13 fráköst og 10 stoðsendingar.

Helena var þá með 32 stig, 17 fráköst og 11 stoðsendingar í sigri á Snæfelli 8. mars 2016 og svo með 30 stig, 20 fráköst og 15 stoðsendingar í sigri á Hamri 22. mars 2016.

Svo skemmtilega vill til að Sylvía Rún Hálfdánardóttir var liðsfélagi Helenu í þeim tveimur leikjum árið 2016 en hún var liðsfélagi Jónínu Þórdísar í Hveragerði á laugardaginn.

Danielle Rodriguez hefur náð þessu þrisvar sinnum en það var allt tímabilið 2017–18, eða löngu áður en hún fékk íslenskan ríkisborgararétt.

Brittanny Dinkins er sú sem á flestar þrjátíu stiga þrennur í sögu efstu deildar kvenna eða fimm talsins.