Sinueldur við Elliða­vatn

Fylgjast má með gangi mála í vaktinni neðst í fréttinni.

Fyrst um sinn var einn dælubíll sendur á vettvang og talið að hægt væri að ráða niðurlögum eldsins. Hins vegar tók eldurinn að dreifa sér og sést reykurinn út um allt höfuðborgarsvæðið. 

Sjúkraflutningamenn eru einnig á vettvangi. Allt tiltækt lið hefur verið boðað út samkvæmt slökkviliðinu. Þeir eru samt sem áður bjartsýnir.

„Við erum ekki alveg að ná að hemja þetta,“ segir varðstjóri.

Samkvæmt sjónarvotti er sinueldurinn orðinn um kílómetra langur og teygir sig í átt að hinum sögufræga útivistarsvæði Guðmundarlundi. Slökkviliðið staðfesetir að tungan sé sirka kílómetrs löng. 

Mikið umferðaöngþveiti er á svæðinu vegna forvitinna vegfaranda og eiga viðbragðsaðilar erfitt með að komast að. Fólk stendur þá ansi nálægt eldinum.

Samkvæmt ábendingu til fréttastofu hefur lögreglan lokað fyrir umferð um Flóttamannaleiðina vegna eldsins.

Myndir frá lesendum Vísis sýna að reykurinn sést alla leið vestur í bæ að Háskóla Íslands og þá finnst lykt af eldinum alla leið að álverinu í Hafnarfirði. Dreifst hefur mikið úr eldinum á skömmum tíma miðað við ljósmyndir af vettvangi.

Alls hefur slökkviliðið farið í fimm útköll á rétt rúmum sólarhring vegna sinuelda víðs vegar á höfuðborgarsvæðinu.

Á svipuðum tíma í gær kom upp eldur á Kjalarnesi og í nótt kviknaði sinueldur bæði í Norðlingaholti og við Vífilsstaðavatn í Garðabæ. Fyrr í dag kviknaði eldur á Reykjavíkurflugvelli. 

Hér að neðan má fylgjast með vaktinni. Ef hún birtist ekki er ráð að endurhlaða (e. refresh) síðuna.