Vissu ekki að bíllinn hefði oltið fyrr en þær sáu myndir

Systurnar Hildur Ylfa og Sara Eyþórsdætur, voru á leið til Reykjavíkur frá Ísafirði laugardaginn 14. febrúar. 

„Það var búið að vera fín færð þar til við komum á Klettshálsinn og þá var kominn svolítill snjór, maður sá ekki að það var glerhálka. Ég hægi mikið á mér og það er bíll fyrir framan mig sem alveg brunar í gegnum hálkuna,“ segir Hildur.

Þær hafi síðan keyrt fram á hálkublett og lýsir Hildur því að sama hvað hún gerði gat hún ekki haldið bílnum á veginum, þrátt fyrir að bíllinn væri á nagladekkjum.

„Við rennum út af, við vissum ekki að við hefðum farið í veltu, þetta gerðist svo fljótt að um leið og þetta gerðist þá vorum við í nokkrar mínútur að hugsa hvað við ættum að gera næst.“

Hildur segist ekki hafa gert sér grein fyrir því að bíllinn valt fyrr en hún sá myndir af gjöreyðilögðum bílnum.

Stálheppnar að sjúkraflutningamann bar að

Hildur segir þær báðar hafa verið nokkrar mínútur að átta sig á aðstæðunum. Hún reyndi að hringja í neyðarlínuna en gat það ekki þar sem ekkert símasamband var á svæðinu. Bíllinn var á hlið, Hildur nær jörðinni og Sara ofar, og þær komust ekki út.

Hildur deildi myndskeiði af þeim úr bílnum og skrifar undir hversu mikilvægt það sé að nota belti.

„Við vorum stálheppnar að það kemur bíll fimm mínútum seinna, sér okkur og stoppar og kom og hjálpar okkur út úr bílnum,“ segir Hildur.

Í bílnum var ungt par sem opnaði dyrnar farþegamegin. Það reyndist hins vegar erfitt að losa Söru án þess að hún myndi detta á systur sína.

„Ég nota fæturna mína og spyrni henni upp. Ég tek síðan í handfangið á hliðinni og næ að klifra sjálf út. Þegar við erum komnar út er komið annað par sem er á leið til Ísafjarðar og konan var sjúkraliði. Hún bauð okkur verkjalyf en við afþökkuðum enda fundum við ekki fyrir verkjum fyrr en nokkrum tímum seinna.“

Þriðja parið kom þeim til aðstoðar nokkrum mínútum seinna en þar um borð var sjúkraflutningamaður frá Reykjavík. Hildur segir þær afar heppnar að fólk með reynslu hafi komið þeim til aðstoðar.

Rétt potað

Hildur og Sara fengu far nokkra leið til að komast í símasamband og keyrði síðan föðurbróðir þeirra systurnar til Reykjavíkur. Þar fóru þær á bráðamóttöku Landspítalans

„Þá fengum við að vita að við værum tognaðar í hálsi og herðum og ég í brjóstkassanum líka. Ég er góð þar núna en finn enn rosalega í hálsinum og herðunum en þegar við förum upp á bráðamóttöku þá læt ég vita að ég vilji láta kíkja á systur mína fyrst þar sem hún var í heilaskurðaðgerð í fyrra,“ segir Hildur.

Hún var heldur óánægð með þjónustuna á bráðamóttökunni og segir læknana hafa „rétt potað“ í þær og útskrifað án verkjalyfja. Hildur fór sjálf á Læknavaktina nokkrum dögum síðar og fékk uppáskrifuð verkjalyf vegna meiðslanna.