Baðst lausnar hjá botnliðinu

Hákon Hjartarson hefur að eigin ósk látið af störfum sem þjálfari liðsins og arftaki hans er þegar fundinn.

Hallgrímur Brynjólfsson, sem þekkir vel til hjá liðinu, mun stýra því út tímabilið og hafa Sævar Elí Kjartansson til aðstoðar en hann var einnig aðstoðarþjálfari Hákonar.

Hallgrímur stýrði Hamri/Þór í þrjú ár í 1. deild áður en hann hætti og tók við liði Fjölnis sem hann stýrði í efstu deild tímabilið 2023-24.

Í tilkynningu færir meistaraflokksráð Hamars-Þórs Hákoni bestu þakkir fyrir hans framlag til félagsins. Þar segir að hann hafi unnið gríðarmikið og gott starf í uppbyggingu kvennakörfunnar á Suðurlandi og lagt mikilvægan grunn að áframhaldandi þróun liðsins.