„Rétt „outfit“ getur bjargað deginum“

Rósa ræddi við blaðamann um persónulegan stíl, fataskápinn og fleira í þeim tískudúr.

Hvað finnst þér skemmtilegast við tískuna?

„Mér finnst skemmtilegast hvað tíska gefur manni mikið tækifæri til að leika sér og prófa sig áfram. Að para saman ólíkar flíkur og búa til ný lúkk og silúettur.“

Hver er uppáhalds flíkin þín og af hverju?

„Uppáhalds flíkin mín er jakki sem ég saumaði sjálf úr gömlum 66°Norður buxum og gömlum vindjakka sem ég fann í Rauða krossinum.“

Eyðirðu miklum tíma í að velja föt hverju sinni?

„Ég myndi segja bæði já og nei. Ég er oftar en ekki á síðustu stundu, þannig stundum þarf ég bara að taka smá áhættu eða leap of faith og vona það besta þegar ég er að setja saman outfit. Þegar ég hef tíma finnst mér þó ótrúlega gaman að púsla lúkkinu saman.“

Hvernig myndirðu lýsa stílnum þínum?

„Ég myndi segja að stíllinn minn akkúrat núna sé blanda af Y2K og götustíl eða street style með smá skvísu fíling. Of stórar eða oversized, víðar flíkur, lág mittisbönd, stórir jakkar og góðir hælar eru lykilatriði.“

Hefur stíllinn þinn breyst mikið í gegnum tíðina og hvernig þá?

„Já en mér finnst stíllinn minn samt alltaf með svipaðan kjarna. Ég notast alltaf við svipaða litapallettu. Ég hef alltaf haft smá gellustíl með dass af streetwear og nota ennþá gamlar flíkur sem felast aftast í fataskápnum. 

Það sem hefur kannski breyst mest er að ég leyfi mér að prófa mig meira áfram en áður.“

Nýturðu þess að klæða þig upp?

„Algjörlega. Ég tek alltaf eftir því að ég er í miklu betra skapi þegar ég er ánægð með lúkkið mitt. Rétt outfitt getur bjargað deginum.“

Hvað skiptir þig mestu máli í klæðaburði?

„Að líða vel í fötunum sínum er algjört lykilatriði, ef manni líður ekki vel í flíkinni þá sést það strax.“

Hvaðan sækirðu innblástur í tískunni?

„Fyrsti innblásturinn minn var klárlega mamma mín. Hún er algjört tískuicon og ég stelst ennþá reglulega í fataskápinn hennar.

Í dag fæ ég líka mikinn innblástur frá vinkonum mínum og fólkinu í kringum mig. 

Við elskum að lána föt okkar á milli og hjálpa hvor annarri að prófa nýja hluti.“

Ertu með einhver boð og bönn þegar það kemur að klæðaburði?

„Eiginlega ekki, mér finnst skemmtilegast að sjá fólk með einkennandi fatastíl. 

Eina bannið er kannski bara að klæðast einhverju sem mér líður ekki vel í eða mögulega fötum frá Shein. Bestu fötin leynast oftast í rauðakrossinum eða á Vinted.“

Hver er eftirminnilegasta flík sem þú hefur klæðst og af hverju?

„Jakki sem ég fann á götumarkaði í Madrid stendur klárlega upp úr.

Hann er úr leðri og geitaskinni og hefur mikinn karakter, svona flík sem maður gleymir aldrei.“

Hvað finnst þér heitast fyrir 2026?

„Ég er að vona að 2000s tíska mun halda áfram að veita innblástur og að clean girl æðið fari í smá kælingu. 

Einnig er ég spennt fyrir að sjá pinnahæla, litríkar sokkabuxur, blúndu, skrautlegt skart og gleraugu.“

Býrðu yfir einhverju góðu ráði þegar það kemur að tísku?

„Treystu þínum eigin smekk. Besta lúkkið er alltaf það sem lætur þér líða eins og bestu útgáfuna af sjálfri þér.“