Körfuboltaþjálfari leiddur af velli í hand­járnum

Myndbönd á samfélagsmiðlum sýna Taylor í orðaskiptum við öryggisvörð á meðan leikmenn Tuskegee og erkifjendanna í Morehouse College tókust í hendur og þökkuðu hvor öðrum fyrir leikinn á laugardag.

Eftir stutt orðaskipti setti öryggisvörðurinn Taylor í handjárn og leiddi hann af vellinum og inn á gang á Forbes Arena, heimavelli Morehouse.

Bæði Taylor og Reginald Ruffin, íþróttastjóri Tuskegee, sögðu að Taylor hefði beðið öryggisvörðinn um að fjarlægja nokkra ruðningsleikmenn Morehouse úr handabandslínunni.

Taylor sagði í yfirlýsingu að ruðningsleikmennirnir hefðu verið að „öskra blótsyrði“ á meðan Ruffin bætti við að þeir hefðu ógnað öryggi allra.

„Ég er orðlaus og misboðið“

„Ég er orðlaus og misboðið yfir því hvernig brotið var á mér og hvernig komið var fram við mig í dag,“ sagði Taylor í yfirlýsingu til margra fjölmiðla.

„Það er átakanlegt fyrir mig að leikmenn mínir, fjölskylda mín og fólk frá Tuskegee hafi orðið vitni að þessu,“ sagði Taylor.

„Ég var einfaldlega að reyna að koma ruðningsliðinu úr handabandslínunni þar sem þeir fylgdu fast á eftir mér og liðinu og öskruðu blótsyrði! Þetta var mjög hættulegt ástand,“ sagði Taylor. Hann ætlar að leita réttar síns fyrir dómstólum.

Ósammála mati lögreglumannsins

Ruffin sagði við HBCU Gameday að öryggisvörðurinn hefði gefið aðra lýsingu á atvikinu og haldið því fram að Taylor hefði verið „mjög árásargjarn“. Ruffin sagðist ósammála mati lögreglumannsins og vísaði til „öryggisráðstafana“ sem væru „fyrirskipaðar af deildinni“ og bætti við að honum fyndist Taylor hafa brugðist við á skynsamlegan hátt.

„Hann spurði öryggisvörðinn: ‚Geturðu vinsamlegast fjarlægt þá úr línunni?‘ Það var það sem hann bað öryggisvörðinn um,“ sagði Ruffin við HBCU Gameday.