Hvernig breytirðu þér í Dag Sigurðs­son?

Dagur Sigurðsson var fyrirliði íslenska landsliðsins um árabil, skoraði 399 mörk í 215 landsleikjum og hefur átt farsælan feril sem þjálfari. Dagur þjálfaði þýska landsliðið til gullverðlauna á EM 2016 og bronsverðlauna á Ólympíuleikunum sama ár, þjálfaði Japani frá 2017 til 2024 og tók þá við þjálfun króatíska landsliðsins.

Dagur byrjaði tíma sinn hjá Króatíu vel og kom þeim á Ólympíuleikana 2024 þar sem uppskeran var þó aðeins níunda sæti. Síðan þá hefur liðið farið með himinskautum, hrepptu silfur á Heimsmeistaramótinu í fyrra og brons á EM núna.

Sérstaka athygli vakti á mótinu þegar Dagur lét mótshaldara heyra það fyrir lélega skipulagningu mótsins sem kæmi niður á heilsu leikmanna. Fyrir utan bronsið og blaðamannafundinn frumsýndi Dagur líka óbeint kærustu sína, Ásu Ingu Þorsteinsdóttur, sem hann hefur verið að slá sér upp með undanfarna mánuði.

Sjá einnig: Kossaflens hjá Degi og Ásu í króatískri sigurvímu

Fjölmiðlar og sérfræðingar hafa keppst við að lofa þjálfarann en sennilega hefur enginn sýnt honum eins mikinn heiður og Marina Mamic, förðunarfræðingur og TikTok-stjarna.

Fyrir tveimur dögum síðan, í undirbúningi fyrir bronsleikinn, birti hún förðunarmyndband þar sem hún var búin að breyta sér í þjálfarann og sama dag endurlék hún blaðamannafund hans frá mótinu. 

Í gær birti Marina svo þriðja myndbandið þar sem hún sýndi frá öllu ferlinu og hvernig hún umbreytti sér í þjálfarann vinsæla.