„Snorri á alla mína sam­úð“

Ísland gerði 38-38 jafntefli við Sviss í þriðja leik milliriðilsins á EM í handbolta. Strákarnir okkar spiluðu slakan varnarleik, tókst samt að jafna leikinn undir lokin en náðu ekki að stela sigrinum í síðustu sókninni. Stigið gerir lítið fyrir liðið í baráttunni um undanúrslit og Ísland þarf að treysta á önnur úrslit.

Þeir Rúnar Kárason, fyrrverandi landsliðsmaður í handbolta og Sebastian Alexandersson, handboltaþjálfari fóru yfir leikinn með Stefáni Árna Pálssyni í Besta sætinu.

„Það er bara skítavinnan sem vantar upp á, að leggja hart að sér og vera tilbúinn til þess að leggja á sig þessa ósýnilegu vinnu í vörninni. Það var það sem vantaði í leikinn. Það er bara erfitt og leiðinlegt en gefur mestu verðlaunin,“ sagði Rúnar Kárason. 

„Snorri á alla mína samúð. Hann reyndi alls konar uppstillingar og það virtist fátt ganga. Svo fann hann uppstillingu sem virkaði og hélt sér við hana,“ sagði Sebastian Alexandersson. „Hann reyndi, þú sást það alveg.“

Hlusta má á uppgjör Besta sætisins í spilaranum hér fyrir ofan eða á hlaðvarpsveitum í gegnum neðangreinda hlekki.