Sjáðu markasýningu Viggós í dag

Dyn-sjónvarpsstöðin tók saman nokkur mörk frá Viggó úr leiknum undir fyrirsögninni: „Velkomin í Kristjánsson-sýninguna.“

„Íslendingurinn skorar hvorki meira né minna en tíu af alls sextán mörkum Erlangen í fyrri hálfleiknum einum saman,“ skrifaði Dyn Handball á Instagram í hálfleik og sýndi mörk úr hálfleiknum sem sjá má hér fyrir neðan.

Þar má sjá Viggó skora með gegnumbrotum, langskoti, úr víti og svo tvisvar í tómt markið þegar markvörður mótherjanna hafði ekki skilað sér í tíma aftur í markið sitt.

Viggó hafði mest skorað tólf mörk í einum leik á þessu tímabili og fjórtán mörk í einum leik í þýsku deildinni á ferlinum. Hann bætti bæði þessi met með því að skora alls sextán mörk í leiknum.

Viggó nýtti sextán af nítján skotum sínum sem gerir ótrúlega 84 prósent skotnýtingu en aðeins þrjú af mörkum hans komu úr vítum. Hann gaf einnig fjórar stoðsendingar og kom því með beinum hætti að 20 af 36 mörkum liðsins eða meira en helmingi markanna.

Hér fyrir neðan má síðan sjá sviðmyndir frá leiknum.