Ómar á fæðingar­deild en Snorri valdi sinn sterkasta hóp

Ísland mætir Svíþjóð 19. og 21. mars hér á landi, á Hlíðarenda og í Kaplakrika, í fyrstu leikjunum eftir að Ísland náði 4. sæti á EM. Svíar koma hingað til lands í hefndarhug eftir skellinn gegn Íslandi á mótinu.

Snorri getur þó ekki nýtt krafta Ómars Inga Magnússonar en kona hans á von á barni í þessum mánuði. Þá er Bjarki Már Elísson búinn að vera að glíma við meiðsli og er ekki með en Stiven Valencia kemur í hans stað í vinstra hornið.

Elvar Örn Jónsson er hins vegar í hópnum en hann er að komast af stað að nýju eftir meiðslin á EM.

Reynir Þór Stefánsson fær nú sæti í hópnum, á kostnað Andra Más Rúnarssonar. Sigvaldi Björn Guðjónsson kemur inn í hægra hornið að nýju og Ísak Steinson er þriðji markvörðurinn í hópnum að þessu sinni.

Íslenski hópurinn kemur saman til æfinga 16. mars og mun stuðningsmönnum gefast kostur á að hitta leikmenn á sérstökum viðburði fyrir leikina.