Gefur Snorra toppeinkunn: „Gríðar­leg pressa á honum“

Íslenska karlalandsliðið hefur farið afar vel af stað á yfirstandandi Evrópumóti. Eftir fyrstu tvo leiki sína er liðið með fullt hús stiga, komið áfram í milliriðla og mun á þriðjudaginn kemur leika úrslitaleik við Ungverja um toppsæti riðilsins.

Snorri Steinn, landsliðsþjálfari, hefur ekki stigið feilspor til þessa á mótinu og gáfu sérfræðingar Besta sætisins honum toppeinkunn fyrir uppleggið gegn Póllandi í dag í leik sem að lauk með átta marka sigri Íslands, 31-23.

Leikurinn var gerður upp í hlaðvarpsþætti íþróttadeildar Sýnar, Besta sætinu, sem Stefán Árni Pálsson stjórnaði en sérfræðingar þáttarins voru þeir Einar Jónsson og Jóhann Gunnar Einarsson.

„Mér fannst þetta bara allt upp á tíu hjá honum. Það er eiginlega ekki hægt að finna eitthvað að. Uppleggið, róteringin á liðinu, lausnirnar sem voru í gangi inn í leiknum. Það var einhvern veginn allt upp á tíu,“ sagði Einar Jónsson, þjálfari ríkjandi Íslands- og bikarmeistara Fram og sérfræðingur Besta sætisins, aðspurður hvaða einkunn hann gæfi Snorra Steini, landsliðsþjálfara fyrir leik kvöldsins.

Eins og Snorra líði betur

Snorri Steinn er á sínu þriðja stórmóti sem landsliðsþjálfari Íslands og segist Einar taka eftir breytingum hjá landsliðsþjálfaranum milli stórmóta.

„Utan frá séð lítur út fyrir að honum líði betur. Það er miklu meiri orka í honum. Hún er rosalega mikil...Það er allt bara að smella miklu betur hjá honum. Hann er búinn að gera þetta ógeðslega vel. Síðasta mót var líka mjög gott undir hans stjórn en auðvitað erum við dæmdir af þessum eina leik sem tapaðist.“

Ekki sé til það þjálfarastarf á Íslandi þar sem pressan er meiri en á landsliðsþjálfara íslenska karlalandsliðsins í handbolta.

„Umfjöllunin er gígantísk, endalaust af upplýsingum og fréttum þannig að það vita allir hvað er að gerast,“ bætti Jóhann Gunnar Einarsson, sérfræðingur Besta sætisins við. „Þegar að það gengur vel þá er þér hrósað en um leið og eitthvað klikkar er svoleiðis baunað yfir þig. Það er gríðarleg pressa.“

„Er bara ekki sátt með það“

Það gengur vel núna en stóridómur fellur þar mótinu er lokið. 

„Hann verður bara dæmdur af niðurstöðunni hverju sinni,“ segir Einar um Snorra. „Það er erfitt að vera segja „við spiluðum frábærlega“ en svo endum við kannski í tíunda eða tólfta sæti, eða þessum sætum sem við höfum verið að enda í á þessum síðustu stórmótum. Það er bara ekki sátt með það.“

„Alveg sama hvort um sé að ræða meðal fjölmiðla, sérfræðinga eða fólksins heima í stofu. Það er gríðarleg pressa á honum og ég held hann sé meðvitaður um það á þessu móti að það er krafa um árangur og að niðurstaðan verði góð. Ég held að hann hljóti líka að vera með þá kröfu og pressu á sjálfan sig að vilja ná árangri á þessu móti.“

Hlusta má á nýjasta þátt Besta sætisins í gegnum spilarann hér fyrir ofan eða streymisveitum í gegnum hlekkina hér fyrir neðan.