Spálíkan kippir okkur niður á jörðina fyrir EM

Leikir Evrópumótsins, sem hefst í dag, voru keyrðir eitt hundrað þúsund sinnum í gegnum spálíkan Peters þar sem meðal annars var tekið var til­lit til styrk­leika liðanna sem á mótinu keppa, fyrri árangurs, úr­slita á stór­mótum og stöðu liðanna á heims­listanum sem og stöðu þeirra á sérstökum evrópskum styrkleikalista.. Þá er hið ó­vænta einnig tekið með í myndina. Hundrað þúsund útgáfur af mótinu dregnar saman í eina niðurstöðu.

Innlendir og erlendir sérfræðingar hafa hingað til verið afar bjartsýnir fyrir gengi Íslands á komandi Evrópumóti og hafa margir hverjir bent á að leið liðsins í undanúrslit mótsins sé einkar hagstæð. Ísland hefur keppni á mótinu á morgun gegn Ítalíu í F-riðli en er að auki með Póllandi og Ungverjalandi í riðli.

Spálíkanið er hins vegar ekki eins bjartsýnt á gengi Íslands á mótinu. Þegar að niðurstaða þess er skoðuð þykir líklegast að Ísland endi í sjöunda til tólfta sæti Evrópumótsins og af þessum sætum er talið líklegast að áttunda sæti á Evrópumótinu verði niðurstaðan fyrir Ísland. Það er miðgildið þegar staða Íslands er skoðuð. 

Þegar möguleikar Íslands á því að komast í undanúrslit Evrópumótsins, hið minnsta, eru skoðaðir gefur niðurstaða spálíkansins það til kynna að tæplega 20 prósent líkur séu á því að það raungerist. 

Sömu gögn gefa til kynna 1,7 prósent líkur á því að Ísland verði Evrópumeistari. Líkurnar hvað þetta varðar eru hagstæðari íslenska landsliðinu en nokkru sinni áður þegar spálíkanið hefur verið notað í aðdraganda stórmóts.

Baráttan um titilinn galopin

Ríkjandi Evrópumeistarar Frakka eru, samkvæmt niðurstöðu spálíkansins, líklegastir til þess að standa uppi sem Evrópumeistarar að móti loknu en afar mjótt er á munum milli efstu liða og reiknast líkur Frakka á Evrópumeistaratitlinum 26 prósent. 

Gefur það meðal annars til kynna að baráttan um Evrópumeistaratitilinn sé „galopin,“ að sögn Peters og spáir líkanið jafnari stórmóti, með tilliti til baráttunnar um titilinn, en undanfarin tvö ár.

Peter O‘Donoghue hefur starfað við íþróttafræðideild HR frá árinu 2022. Hann er þekktur vísindamaður í íþróttaheiminum sem hefur sérhæft sig á sviði frammistöðugreininga í íþróttum (e. sport performance analysis) og m.a. starfað hjá enska knattspyrnusambandinu.

Hér fyrir neðan má sjá HR stofuna frá því fyrr í dag þar sem að sérfræðingar fóru yfir komandi Evrópumót og möguleika Íslands þar.

Íslenska karlalandsliðið í handbolta hefur leik á EM á morgun þegar liðið mætir Ítalíu í fyrsta leik F-riðils klukkan fimm. Leiknum verður lýst í beinni textalýsingu á Vísi.