Hæsta konan í sögu banda­ríska háskóla­boltans bíður eftir leyfi

Okechukwu verður hæsta konan í sögu bandaríska háskólaboltans þegar hún spilar sinn fyrsta leik fyrir Texas Tech-háskólann.

Þessi 2,16 metra hái miðherji valdi að spila með kvennakörfuboltaliði Texas Tech fram yfir nokkra aðra skóla sem kepptust um að fá hana til liðs við sig. Hún gæti leikið sinn fyrsta háskólaleik í febrúar.

„Stephanie er loksins komin til Lubbock og hún var svo sannarlega þess virði að leggja á sig allan þann tíma, fyrirhöfn og samvinnu sem fór í að koma henni hingað,“ sagði Krista Gerlich, þjálfari Texas Tech, í viðtali á heimasíðu skólans.

„Hún færir liðinu okkar þátt sem hefur tafarlaus áhrif. Hæfileiki hennar til að verja körfuna og trufla skot verður einstakur. Hún er með frábærar hendur og snertingu í kringum körfuna og mun augljóslega vera stórt skotmark undir körfunni,“ sagði Gerlich.

„Hún hugsar fyrst og fremst um liðið og er tilbúin að leggja sitt af mörkum á allan mögulegan hátt. Hún passar frábærlega inn í prógrammið okkar og menningu og við erum himinlifandi með að hún sé komin til Lubbock. Starfsfólk okkar vinnur áfram með NCAA að leikheimild hennar,“ sagði Gerlich.

Okechukwu, sem er hæsti kvenkyns háskólakörfuboltaleikmaður í sögu íþróttarinnar, gekk í Fukuchiyama Seibi-menntaskólann í Kyoto í Japan, þar sem hún öðlaðist hluta af körfuboltareynslu sinni. Okechukwu talar þrjú tungumál (ensku, ígbó og japönsku) og ætlar að leggja stund á viðskiptafræði.

Hún mun ganga til liðs við Lady Raiders á þessari önn. Texas Tech-háskólinn bíður svars frá NCAA til að ákvarða leikheimild Stephanie, sem mun ráða því hvenær hún spilar sinn fyrsta leik í rauðu og svörtu.

„Fyrir aðeins nokkrum árum síðan hófum við markvissa leit að erlendum leikmönnum,“ sagði Erik DeRoo aðstoðarþjálfari við heimasíðu skólans.

„Alþjóðlegi körfuboltinn hefur vaxið gríðarlega, sem gefur okkur nú tækifæri til að fá efnilega leikmenn alls staðar að úr heiminum, og eins og sést á núverandi leikmannahópi okkar hefur það þegar skilað árangri,“ sagði DeRoo.

„Samböndin sem byggst hafa upp síðustu tvö ár gáfu okkur tækifæri til að fá og að lokum semja við Stephanie. Við vitum öll að fyrirsagnirnar munu snúast um augljósa hæð hennar, 2,16 metra, en Stephanie er ótrúleg manneskja á öllum sviðum lífsins,“ sagði DeRoo.

„Hún hefur frábæra sögu að segja, allt frá uppvexti sínum til menntunar, körfuboltareynslu og jafnvel ferlisins við að koma henni til Texas Tech. Stephanie er full af gleði og elskar körfubolta. Við getum ekki beðið eftir að Lady Raider Nation og samfélagið í Texas Tech fái að kynnast henni,“ sagði DeRoo.