McGinn með tvennu í öruggum sigri Aston Villa

Aston Villa vann 3-1 gegn Nottingham Forest í 20. umferð ensku úrvalsdeildarinnar. Ollie Watkins braut ísinn fyrir heimamenn undir lok fyrri hálfleiks og John McGinn skoraði tvennu í seinni hálfleik.

Aston Villa sneri þarna aftur á sigurbraut og komst upp í annað sæti deildarinnar eftir stórt tap í síðustu umferð en ellefu sigurleiki þar á undan. Nottingham Forest hefur hins vegar tapað fjórum deildarleikjum í röð, sjö af síðustu tólf og situr í sautjánda sætinu.

Leikurinn bar þess merki að þarna væru lið á sitt hvorum enda töflunnar að mætast. Heimamenn sýndu mikla yfirburði en gestirnir vörðust.

Eftir margar tilraunir tókst Aston Villa loks að skora í uppbótartíma fyrri hálfleiks. Ollie Watkins átti gott skot fyrir utan vítateig eftir sendingu frá Morgan Rogers.

Töpuðu boltanum aftur í upphafi seinni hálfleiks

Í upphafi seinni hálfleiks tapaði Nottingham Forest boltanum aftur á eigin vallarhelmingi og Aston Villa refsaði. Matty Cash sendi boltann þá á fyrirliðann John McGinn sem skoraði og fagnaði eins og ofurmennið Hulk.

Gibbs-White minnkaði muninn

Nottingham tókst að minnka muninn, þvert gegn gangi leiksins, eftir rúmlega sextíu mínútur. Morgan Gibbs-White skoraði þá eftir snögga skyndisókn og stoðsendingu frá Dilane Bakwa.

Markmaðurinn í skógarhlaupi

En Aston Villa var enn með yfirhöndina og fyrirliðinn McGinn skoraði annað mark eftir rúmlega sjötíu mínútna leik.

Markmaður Nottingham Forest, John Victor, fór út í mjög slæmt skógarhlaup og leit hreint hræðilega út í því marki.

Hann lagðist svo í grasið og hélt um kálfann þangað til varamarkmaðurinn Matz Sels kom inn á.

Sels þurfti ekki að hafa sig við því fleiri skot voru ekki tekin.