Andri Lucas missti af þriðja leiknum í röð og á­fram markaleysi án hans

Blackburn tapaði í dag 2-0 á heimavelli á móti Wrexham í ensku B-deildinni í fótbolta.

Liðið hefur aðeins náð í tvö stig í síðustu þremur leikjum og situr í nítjánda sæti deildarinnar.

Sam Smith (á 11. mínútu) og Oliver Rathbone (á 38. mínútu) skoruðu fyrir Wrexham sem komst upp í áttunda sæti með þessum sigri.

Þetta var þriðji leikurinn sem Andri Lucas missir af vegna meiðsla og hinir tveir enduðu með markalausu jafntefli á móti Middlesbrough og Sheffield Wednesday.

Blackburn hefur því spilað 294 mínútur án þess að skora síðan Andri var síðast inni á vellinum.

Hann skoraði í síðasta leik sínum sem var 2-0 sigur á Millwall 20. desember.

Andri hefur alls skorað sjö mörk í sautján deildarleikjum á sinni fyrstu leiktíð með Blackburn Rovers.