MAST búið að snúa hnífnum

Þetta segir Margrét Víkingsdóttir sem hefur lengi átt í deilum við MAST um heilsu hundsins. Hún fékk tilkynningu um frestunina á föstudag og furðar sig á vinnubrögðum stofnunarinnar. 

Hundurinn hafi vissulega gengist undir endurhæfingu og meðhöndlun frá því að hann greindist með gigt og meðal annars tekið inn verkjalyf. Tíu ára gamli hundurinn, sem er einnig kallaður Úffi, er Margréti mjög kær en hann bjargaði henni frá eldsvoða í fyrra.

„Mér er haldið alveg með hnífinn í og það er bara verið að snúa honum aðeins. Þetta er bara ömurlegt,“ segir Margrét. MAST hefur gert athugasemdir við heilsufar Úffa og að hann hafi reglulega verið í bandi fyrir utan heimili Margrétar í miðborg Reykjavíkur. Í tilefni ábendinga hóf MAST eftirlit og komst dýralæknir þeirra að því að hundurinn væri gigtveikur og með skerta hreyfigetu.

Sjá einnig: Dagar Úffa mögu­lega taldir

Margrét segist hafa álit annarra dýralækna sem segi lífsgæði hundsins ágæt miðað við aldur.

Síðast í gær hafi hún leitað til nýs dýralæknis í Kópavogi sem hafi skoðað Úffa og furðað sig á framgöngu MAST. „Hann sagði bara: „Ég trúi þessu ekki. Ég sé alveg að hundurinn er pínu haltur, hann er með gigt og hann er tíu ára. En þetta er fjörugur og góður strákur.““

Að sögn Margrétar taldi hann ekki ástæðu fyrir MAST að fara fram á aflífun og hyggist að útbúa heilsufarsskýrslu sem bætist í bunka skjala frá öðrum dýralæknum.

„Hann var bara eiginlega alveg gáttaður,“ bætir hún við. Það væri eðlilegt að hundur með gigt sé svolítið haltur. Bæði sé hann að taka inn verkjalyf og í þjálfun.

Fréttamaður kíkti í heimsókn til Margrétar og Úffa í kvöldfréttum Sýnar á fimmtudag.

Lítur á þetta sem valdníðslu

„Sum sé þá ætla þau sem sagt ekki að lóga honum núna heldur kannski eftir mánuð ef ég verð ekki þæg, og fer með hann í allar meðferðir og ég get sannað það að hann sé í meðferð. Þetta er niðurstaðan í dag,“ segir Margrét um nýjustu vendingarnar í málinu.

Hún sér þetta ekki sem áfangasigur heldur að MAST sé einungis að lengja í hengingarólinni.

Sjá einnig: Spyr hvort af­lífa þurfi sig vegna mjaðmaskipta

„Þetta er bara óboðsleg valdníðsla og frekja. Ég meina, hvað eru margir hundar á Íslandi, af hverju látið þið fara svona með einn hund? Bara af því að hann er Schafer og býr niðri í miðbæ? Það er einhvern veginn verið að sýna einhver völd þarna.

Kannski af því að þegar þau stóðu hérna yfir mér, húsið var brunnið og ég var þarna niðri í kjallara með hundinn fyrir utan og opið inn þá ofbauð mér svo þessi afskipti og var ekkert sérstaklega orðfögur við þau. Ég held að ég hafi bara sagt þeim að hundskast í burtu og þetta kæmi þeim ekkert við,“ segir Margrét. 

Hún hafi orðið mjög reið þegar þrír fulltrúar MAST mættu fyrst til hennar. Þá hafi eflaust ekki hjálpað að á þeim tímapunkti hafi hún verið orðin langþreytt á því að búa í kjallara hússins og dvelja á hörðu þvottahússgólfi í átta mánuði eftir að íbúð hennar brann og unnið var að viðgerð.

Kannar möguleikann á liðskiptaaðgerð

Margrét segist ekki eiga í neinum vandræðum með að sýna fram á að Úffi hafi gengist undir endurhæfingu og þjálfun hjá dýrasjúkraþjálfara og dýralæknum. „Ég er með þetta allt á pappírum.“

Þá bíði hún eftir að komast með hundinn í sérstakt vatnskar þar sem hann getur gengið á göngubretti og byggt upp vöðvana á afturfótunum sem rýrni vegna gigtarinnar.

„Svo ég er alveg inni í þessu öllu,“ segir Margrét. Einnig kanni hún möguleikann á því að fara með Úffa erlendis þar sem hægt sé að græða í hann gervilið. Slík aðgerð sé ekki ólík því þegar fólk fer í mjaðmaskiptaaðgerð til að auðvelda hreyfingu og draga úr sársauka, að sögn Margrétar en slík aðgerð sé ekki í boði hérlendis.

Hún segist að lokum vera þakklát fyrir þann stuðning sem hún hafi fundið fyrir frá fólki úti í samfélaginu.