„Mikil­vægt að skrifa ekki undir neitt nema vita hvað það er“

Á undanförnum vikum hefur verið fjallað um fjölda sjóða sem ætla sér að fjárfesta með einstaklingum í íbúðahúsnæði. Þetta sé gert til að liðka fyrir lægð í sölu nýbygginga á fasteignamarkaði. Fjármálastöðugleikanefnd Seðlbankans kynnti yfirlýsingu sína í dag þar sem reynt er að sporna við þessari þróun.

Ásgeir Jónsson seðlabankastjóri segir mikilvægt að tekið sé tillit til þessarar nýju leiðar við útreikning á greiðslubyrði.

„Þessi nýja leið við fasteignakaup felur að einhverju marki  í sér miklu lægra eiginfjárframlag kaupanda og hægari eignamyndun. Við viljum að þetta sé rétt fært til bókar í lánþegaskilyrðum,“ segir Ásgeir.

Aðspurður um hvort þessi nýju skilyrði Seðlabankans muni hafa þau áhrif að færri kjósi fjármögnunarleiðir verktakafyrirtækja og sjóða svarar Ásgeir: 

„Ég held það já. Ég vil líka leggja áherslu á að þetta eru flóknir samningar, skilmálarnir eru í tugum blaðsíðna.  Það er mjög mikilvægt að skrifa ekki undir neitt nema vita hvað það er,“ segir Ásgeir.

Fréttastofa hefur heimild fyrir því að einn slíkur samningur hafi verið alls 65 blaðsíður. Ásgeir segir að það sé í höndum Fjármálaeftirlitsins að hafa eftirlit með því að lögum og reglum sem fylgt í slíkum samningum. 

„Það sem við erum að reyna að koma í veg fyrir er að þetta myndi kerfislega áhættu. Þannig að mikið af fólki lendi með neikvætt eiginfé eða eitthvað slíkt eftir einhvern ákveðinn tíma,“ segir Ásgeir. 

Hann tekur fyrir að verið sé að banna nýju fjármögnunarleiðirnar en bankinn hafi áhyggjur. 

„Við óttumst að með því að fresta greiðslum séð að einhverju leyti verið að fara á skjön við þau lánþegarskilyrði sem við erum með og við því er verið að bregðast,“ segir Ásgeir.