Lög­reglan leysti mann úr prísund af salerni mathallar

Til þess að losa manninn úr prísundinni þurfti lögreglan að brjóta upp hurðina.

Þetta er á meðal þess sem kemur fram í dagbók lögreglunnar. Umrætt atvik átti sér stað í umdæmi lögreglustöðvar eitt, sem sér um löggæslu í miðbæ Reykjavíkur, Vesturbæ, Austurbæ, og á Seltjarnarnesi.

Í sama umdæmi var erlendur einstaklingur handtekinn, grunaður um ólögmæta dvöl hér á landi og peningaþvætti. Sá var vistaður í fangaklefa.

Þá var lögregla með eftirlit með starfsréttindum dyravarða á skemmtistöðum í miðborginni. Fram kemur að á einum skemmtistað hafi dyraverðir verið við störf sem ekki höfðu tilskilinn réttindi til þess.