Saka borgar­stjóra um að funda fjarri til að forðast í­búa

Heiða Björg Hilmisdóttir borgarstjóri heimsækir nú hverfi borgarinnar á svokölluðum Hverfadögum. Meðal annars heimsækir hún skóla og stofnanir auk þess sem hún heldur opna viðburði þar sem hægt er að ræða málin.

Samkvæmt heimasíðu Reykjavíkurborgar hófust Hverfadagar í Grafarvogi í gær og standa þeir til 28. nóvember. Þá er einnig haldinn Hverfadagur á Kjalarnesi í dag, 25. nóvember. Í tilefni þess var boðað til kaffispjalls í Klébergsskóla á Kjalarnesi, en staðsetningin féll ekki vel í kramið hjá Grafarvogsbúum.

„Kjalarnes og Grafarvogur eru tvö aðskilin hverfi sem deila hvorki innviðum, samgöngum né samfélagslegri nálægð. Að halda íbúafund fyrir Grafarvogsbúa á Kjalarnesi er í reynd útilokandi fyrir stóran hluta íbúa, sérstaklega barnafólk, eldra fólk og þá sem treysta á almenningssamgöngur,“ segir í yfirlýsingu íbúasamtaka Grafarvogs.

Þar segir að íbúarnir hafi ekki verið hræddir við að láta rödd sína heyrast, til að mynda í skipulagsmálum hverfisins. Sumarið 2024 mótmæltu íbúar Grafarvogs harðlega áformum borgarinnar um nýtingu lóða í helstu úthverfum borgarinnar og kölluðu þau „ofurþéttingu“.

„Það er því óhjákvæmilegt að spyrja sig hvort þessi tilhögun að halda fund fjarri Grafarvogi og án nægilegs aðdraganda sé meðvitað til að forðast beint samtal við íbúa hverfisins.“

Auglýstu vitlausan dag og létu vita samdægurs

Í yfirlýsingu frá íbúasamtökunum er einnig bent á vankanta við boðun kaffispjallsins. Viðburðurinn hafi fyrst verið auglýstur í Morgunblaðinu en þar stóð að fundurinn yrði 26. nóvember, en hann var í raun í dag. Rétt tímasetning hafi verið auglýst með Facebook-viðburði en sá viðburður birtist samdægurs.

„Ef markmiðið er að borgarbúar geti átt í raunverulegu samtali við kjörna fulltrúa, þá verður að tryggja að það samtal sé aðgengilegt og tímanlega boðað. Þessi framkvæmd ber því miður ekki merki um slíka einlægni.“

Vegna þessa krefjast íbúar Grafarvogs þess að haldinn verði annar fundur í hverfi þeirra, með nægum fyrirvara. 

„Samtal við borgarbúa má ekki byggja á handahófi eða útilokun heldur virðingu og aðgengi.“

Uppfært 26. nóvember kl 8:00: 

Í tilkynningu Reykjavíkurborg segir að borgin vilji gjarnan koma því á framfæri að kaffispjall borgarstjóra í Klébergsskóla hafi verið auglýst sem hluti af hverfaheimsókn til Kjalarness í gær, þriðjudaginn 25. nóvember. „Þessi viðburður var aldrei auglýstur sem íbúafundur fyrir Grafarvog og Kjalarnes þó vissulega sé borgarstjóri að heimsækja bæði hverfin þessa viku og viðburðurinn öllum opinn. Í dag, miðvikudaginn 26. nóvember mun borgarstjóri heimsækja fjölmarga staði í Grafarvogi og verður hún meðal annars á opnum félagsfundi Korpúlfa í Borgum klukkan 14. Viðburðir á Hverfadögum Heiðu Bjargar borgarstjóra eru með ólíku sniði í hverju hverfi en hún tekur vel í allar óskir um fundi og segir sjálfssagt að skipuleggja opinn fund með Grafarvogsbúum og mun hann að sjálfssögðu verða auglýstur með góðum fyrirvara,“ segir í tilkynningunni. 

Fréttin hefur verið uppfærð með viðbrögðum frá Reykjavíkurborg.