Hætta rekstri fisk­mjöls­verk­smiðju og tólf missa vinnuna

Þetta kemur fram í tilkynningu frá Síldarvinnslunni. Fram kemur að veiðiheimildir uppsjávartegunda hafi dregist saman og hærra hlutfall af því sem veitt sé fari til manneldisvinnslu. Þá hafi Alþjóðahafrannsóknarráðið (ICES) lagt til að veiði á kolmunna, sem hafi verið uppistaðan í vinnslunni á Seyðisfirði, verði 40 prósent minni á næsta ári. 

„Þessu til viðbótar hafa hækkanir á kostnaðarliðum og auknar opinberar álögur á sjávarútvegsfyrirtæki ýtt undir ákvarðanir sem krefjast meiri hagræðingar í rekstri,“ segir í tilkynningunni. 

Húsnæði á hættusvæði

Ennfremur segir að húsnæði Síldarvinnslunnar á Seyðisfirði sé auk þess á skilgreindu hættusvæði vegna hættu á skriðuföllum og snjóflóðum. 

„Svæðið er ekki á framkvæmdaáætlun Ofanflóðasjóðs um varnir næsta áratuginn samkvæmt svari Ofanflóðanefndar til félagsins. Það er því ekki síður með öryggi starfsmanna að leiðarljósi að ekki gengur að vera með starfsemi á svæðinu.

Í ljósi ofangreinds tók stjórn Síldarvinnslunnar hf. ákvörðun um að hætta rekstri fiskmjölsvinnslunnar á Seyðisfirði. Farið verður í að selja búnað úr verksmiðjunni og ganga frá svæðum í samráði við bæjaryfirvöld.

Tólf starfsmenn missa vinnuna ásamt verktökum. Uppsagnarfrestur var lengdur um einn mánuð og nemur fjórum mánuðum. Að auki býður Síldarvinnslan þeim sem kjósa vertíðarbundna vinnu í fiskiðjuveri félagsins í Neskaupstað.

Síldarvinnslan sammæltist með forsvarsmönnum Múlaþings um ráðningu ráðgjafa sem ynni með sveitarstjórn næstu tólf mánuði, við að fara yfir viðskiptahugmyndir um framtíðarstarfsemi í húsum félagsins. Síldarvinnslan greiðir kostnað við störf ráðgjafans, en fulltrúar sveitarfélagsins fara fyrir vinnunni,“ segir í tilkynningunni. 

Þungbær ákvörðun

Haft er eftir Gunnþóri Ingvasyni, forstjóra Síldarvinnslunnar, að fjölmargt í rekstrarumhverfinu hafi raðast þannig upp síðustu ár að nauðsynlegt sé að taka þessa ákvörðun. 

„Hún er engu að síður þungbær enda tekin eftir ítarlega yfirlegu um framtíð starfseminnar á Seyðisfirði. Við bindum vonir við að samvinnan við sveitarfélagið skapi ný tækifæri fyrir svæðið,“ er haft eftir Gunnþóri.